۔ 20 لاکھ ملازمتوں کی فراہمی کا وعدہ‘الیکشن کے بعدہم خیال پارٹیوں سے اتحاد کا اشارہ
لکھنو:کانگریس جنرل سکریٹری اوریوپی کی انچارج پرینکا گاندھی نے ایک سوال کے جواب میں کہا کہ کانگریس اتنخابات کے بعد اگر ضرورت پڑی تو ہم خیال پارٹیوں کے ساتھ اتحاد کر سکتی ہے لیکن اس کے لئے شرط یہی ہوگی کہ کانگریس کے ایجنڈہ کو حکومت کے ایجنڈہ میں شامل کیا جائے۔ انہوں نے یہ بات کانگریس کے سابق صدر را ہول گاندھی کی موجودگی میں کہی جب دونوں نے اتر پردیش کے نوجوانوں کے لئے وژن دستاویز’بھرتی ودھان‘ جاری کیا۔کانگریس نے پہلے خواتین کے حقوق کی لڑائی کی بات کرتے ہوئے اعلان کیا تھا کہ اس مرتبہ اتر پردیش میں کانگریس 40 فیصد خواتین کو پارٹی کا امیدوار بنائے گی اور اب اس نے نوجوانوں کے لئے ایک وژن دستاویز جاری کیا جس میں نوجوانوں کی نوکریوں سے لے کر ان کے کھیل کود، تعلیم اور صحت پر زور دیا گیا ہے۔اس موقع پر ایک سوال کے جواب میں راہول گاندھی نے کہا کہ وزیر اعظم نریندر مودی کی قیادت میں بی جے پی نے سال 2014 میں جو وژن یا مسقتبل کے لئے راہ پیش کی تھی اس نے ملک کو تباہ کر دیا ہے اور نوجوانوں کو بڑے پیمانہ پر بے روزگار کر دیا ہے۔ انہوں نے کہا کہ اتر پردیش بہت اہم ریاست ہے اس لئے اس وژن کی پہل یہاں سے کی جا رہی ہے اور چھوٹی پارٹیاں اس وژن کو نافذ نہیں کر سکتیں۔’بھرتی ودھان‘ کو جاری کرتے ہوئے انہوں نے کہا کہ ’’ملک اور اتر پردیش کے نوجوانوں کے مسائل سب کو معلوم ہیں اور کانگریس نے اس دستایز کے ذریعہ یہ بتانے کی کوشش کی ہے کہ کانگریس کیسے روزگار دے گی۔‘‘ انہوں نے کہا کہ کانگریس نے یہ نوجوانوں کے لئے منشور اتر پردیش کے نوجوانوں سے بات کر کے تیار کیا ہے۔ اتر پردیش میں ہر روز 880 نوجوان روزگار سے محروم ہو جاتے ہیں اور اب تک 14 لاکھ نوجوانوں نے روزگار کھویا ہے اور اس کی وجہ صاف ہے کہ ملک کا سارا سرمایہ دو تین سرمایہ داروں کے پاس جا رہا ہے۔ کانگریس نفرت پھیلانا نہیں چاہتی بلکہ وہ لوگوں کو جوڑنا چاہتی ہے اور نوجوانوں کی قوت سے نیا ہندوستان بنانا چاہتی ہے۔ پرینکا گاندھی نے کہا کہ سب پارٹیاں نوکریوں کا وعدہ تو کرتی ہیں لیکن یہ نوکریاں کیسے دیں گے اس کا طریقہ نہیں بتایا جاتا۔ پرینکا نے کہا کہ کانگریس اقتدار میں آنے کے بعد 20 لاکھ نوکریاں دے گی اور اس میں سے 8 لاکھ خواتین کو ریزرویشن کے تحت دی جائیں گی۔ انہوں نے ایک بڑا اعلان کرتے ہوئے کہا کہ جاب کیلنڈر یعنی نوکریوں کا کیلنڈر بنایا جائے گا جس میں نوکریوں سے متعلق پوری جانکاری ہوگی اور اس پر عمل نہ ہونے کی صورت میں ذمہ دار لوگوں کے خلاف کارروائی بھی ہوگی اور ان پر جرمانہ بھی عائد ہوگا۔ انہوں نے کہا کہ کانگریس اقتدار میں تمام بھرتی کے لئے امتحان مفت ہوں گے۔
پرینکا گاندھی نے بتایا کہ کانگریس کا یہ دستاویز صرف روزگار فراہمی کی بات نہیں کرتا بلکہ یونیورسٹیوں میں انتخابات کرانا، کھیلوں کے لئے سہولیا ت فراہم کرانا، کھیلوں کے لئے اکیڈمی قائم کرنا، اسکالرشپ کو بڑھنا اور ضرورتمندوں تک کیسے پہنچے اس کو یقینی بنانا، نوجوان اپنا کاروبار کیسے شروع کر سکتے ہیں، صنعتی کلسٹر بنانا، قرض دینا اور صحت کو کیسے بہتر بنایا جائے اس پر تفصیلی بات کرتا ہے۔ انہوں نے اس موقع پر ایک اہم پہلو پر بھی توجہ دلائی کہ ریاست میں نوجوانوں کی ایک آبادی نشہ کی جانب جا رہی ہے اس کو کیسے روکا جائے اور اس کی لت سے متاثرین کو نجات دلانے کے لئے کیمپ لگائے جائیں۔ پرینکا گاندھی نے یہ بھی کہا کہ کانگریس کی کوشش ہے کہ منفی باتوں سے پرہیز کیا جائے اور نوجوانوں کے مستقبل کے لئے کوشش کریں۔ انہوں نے کہا کہ سیاسی پارٹیاں فرقہ وارانہ اور ذات پات کی بات کر رہی ہیں لیکن کانگریس ترقی کی بات کر رہی ہے۔