27اکتوبر کی رات سے ووٹر لسٹ میں تبدیلی تاحکم ثانی معطل ‘ چیف الیکشن کمشنر گیانیش کمارکی پریس کانفرنس
نئی دہلی ۔27؍اکتوبر( ایجنسیز )الیکشن کمیشن آف انڈیا نے اتر پردیش اور مغربی بنگال سمیت 12 ریاستوں میں کل سے ’ایس آئی آر‘ کا عمل شروع کرنے سے متعلق اعلان کر دیا ہے۔ چیف الیکشن کمشنر گیانیش کمار نے آج پریس کانفرنس میں اس سے متعلق جانکاری دی اور کہا کہ جن 12 ریاستوں میں ایس آئی آر کا عمل منگل 28؍ اکتوبر سے شروع ہوگا وہاں کی ووٹر لسٹ آج رات ’فریز‘ ہو جائے گی۔ ہندوستان کے چیف الیکشن کمشنر گیانیش کمار نے پیر کو ملک میں انتخابی فہرستوں کی خصوصی گہری نظر ثانی (ایس آئی آر) کے دوسرے مرحلے کا اعلان کیا۔ انہوں نے کہا کہ ایس آئی آر مشق دوسرے مرحلے میں 12 ریاستوں میں کی جائے گی۔دہلی کے وگیان بھون میں منعقدہ ایک پریس کانفرنس میں چیف الیکشن کمشنر نے کہاکہ میں بہار کے ووٹروں کو مبارکباد دیتا ہوں اور 7.5 کروڑ ووٹروں کو سلام پیش کرتا ہوں جنہوں نے ایک کامیاب ایس آئی آر میں حصہ لیا۔ کمیشن نے تمام 36 ریاستوں کے انتخابی عہدیداروں سے بھی ملاقات کی اور پورے عمل پر تفصیل سے تبادلہ خیال کیا۔سی ای سی نے کہاکہ ایس آئی آر کا دوسرا مرحلہ 12 ریاستوں اور مرکز کے زیر انتظام علاقوں میں منعقد ہونے جا رہا ہے۔ گیانیش کمار نے کہا کہ جن ریاستوں میں ایس آئی آر کرایا جائے گا، ووٹروں کی فہرستیں آج آدھی رات کو منجمد کر دی جائیں گی۔ بعد میں ووٹروں کو تمام تفصیلات کے ساتھ مخصوص گنتی فارم دیے جائیں گے۔انہوں نے کہا کہ ایس آئی آر کا دوسرا مرحلہ نو ریاستوں اور تین مرکز کے زیر انتظام علاقوں میں منعقد کیا جائے گا۔ الیکشن کمیشن نے واضح کیا کہ اس عمل کا مقصد اہل ووٹرز کو فہرست میں شامل کرنا اور انتخابی فہرستوں سے نااہل ووٹرز کو نکالنا ہے۔ چیف الیکشن کمشنر نے نوٹ کیا کہ ملک میں آخری اسپیشل انٹینسیو ریویژن 21 سال قبل کی گئی تھی۔ تبدیلیاں اب ضروری ہیں۔الیکشن کمشنر نے بتایا کہ بی ایل او ہر گھر کا تین بار دورہ کریں گے۔ اس دوران وہ ووٹرز سے ملیں گے اور فہرست میں ان کے ناموں کی تصدیق کریں گے، انہیں ووٹر لسٹ میں اپنا نام شامل کرنے کا فارم دیں گے۔ وہ لوگ جو دن میں گھر سے باہر رہتے ہیں یا دفتر جاتے ہیں، یہ لوگ اپنے نام آن لائن شامل کر سکیں گے۔ نئی ووٹر لسٹ میں اپنا نام شامل کروانے کیلئے پہلے مرحلے میں ووٹرز کو کوئی دستاویز فراہم کرنے کی ضرورت نہیں ہوگی۔ انہیں صرف یہ بتانا ہوگا کہ 2003 کی ووٹر لسٹ میں ان کا نام تھا یا نہیں اور اگر ان کا نام نہیں تھا تو ان کے والدین کا نام تھا۔ الیکشن کمیشن کی ویب سائٹ پر تمام ریاستوں کی 2003 کی ووٹر لسٹ دیکھی جا سکتی ہے۔سی ای سی نے اعلان کیا کہ ایس آئی آر کے دوسرے مرحلے کیلئے پولنگ اہلکاروں کی تربیت منگل سے شروع ہوگی۔ گیانیش کمار نے کہاکہ تمام چیف الیکٹورل افسران اور ڈسٹرکٹ الیکٹورل افسران کو چہارشنبہ تک سیاسی جماعتوں سے ملاقات کرنے اور ایس آئی آر کے عمل کے بارے میں تفصیلات بتانے کی ہدایت دی گئی ہے۔پولنگ بوتھ کی تعداد میں بھی تبدیلی کی جائے گی۔ الیکشن کمشنر نے واضح کیا کہ اب کوئی ایک بوتھ ایک ہزار سے زیادہ ووٹرز کو نہیں رکھ سکتا۔ نتیجتاً پولنگ بوتھوں کی تعداد میں بھی خصوصی نظر ثانی کے بعد تبدیلی کی جائے گی تاکہ کہیں بھی ووٹرز کا ہجوم نہ ہو۔چیف الیکشن کمشنر گیانیش کمار نے انڈمان اور نکوبار، چھتیس گڑھ، گوا، گجرات، کیرالہ، لکشدیپ، مدھیہ پردیش، پڈوچیری، راجستھان، تمل ناڈو، اتر پردیش اور مغربی بنگال میں ایس آئی آر کا اعلان کیا ہے۔انہوں نے واضح کیا کہ تمام اہل ووٹرز کو ایس آئی آر میں شامل کیا جائے گا اور نا اہل ووٹرز کو فہرست سے نکال دیا جائے گا۔ اس حوالے سے کئی میٹنگز ہو چکی ہیں جس میں یہ فیصلہ ہوا ہے۔ انہوں نے کہا کہ جعلی ووٹرز کو روکنے کے لیے انتخابات سے قبل ایس آئی آر کا انعقاد بہت ضروری ہے۔