14ریاستوں میں پھیلے حلقوں کیلئے آج پولنگ ، 2 نومبر کو ووٹوں کی گنتی
نئی دہلی : انتخابی سیاست میں تمام گوشوں کی نظریں ہفتہ 30 اکٹوبر کو 3 لوک سبھا اور 30 اسمبلی حلقوں کیلئے مقررہ ضمنی چناؤ پر مرکوز ہیں۔ لوک سبھا چناؤ کے تحت پولنگ دادر اور نگر حویلی، منڈی (ہماچل پردیش) اور کھانڈوا (مدھیہ پردیش) میں ہوگی جبکہ اسمبلی ضمنی چناؤ 14 ریاستوں میں پھیلی 30 نشستوں کیلئے منعقد کیا جارہا ہے۔ ووٹوں کی گنتی منگل 2 نومبر کو ہوگی۔ بہار میں 2 نشستوں کیلئے ضمنی چناؤ ہورہے ہیں جہاں 2 ایم ایل ایز کا دیہانت ہوا۔ ششی بھوشن ہزاری اور میوالال چودھری دونوں ارکان اسمبلی کا تعلق جے ڈی یو سے تھا۔ ضمنی چناؤ میں جے ڈی یو کو کٹر حریف آر جے ڈی سے سخت مقابلہ متوقع ہے۔ آر جے ڈی سربراہ لالو پرساد یادو نے 6 سال بعد دوبارہ انتخابی مہم میں حصہ لیا ہے۔ توقع ہیکہ دونوں حلقوں کیلئے جے ڈی یو کو سخت مزاحمت کا سامنا کرنا پڑے گا۔ برسراقتدار جے ڈی یو کو مخلوط حکومت میں شامل بی جے پی کی تائید و حمایت حاصل ہے۔ ہماچل پردیش میں منڈی لوک سبھا نشست کے علاوہ 3 اسمبلی سیٹوں کیلئے پولنگ ہوگی۔ اس ریاست میں برسراقتدار بی جے پی کا مقابلہ کانگریس پارٹی سے ہے۔ دونوں کے درمیان سخت مسابقت کی توقع ہے۔ کرناٹک میں بھی دو اسمبلی حلقوں کیلئے ضمنی چناؤ ہورہے ہیں۔ تلنگانہ کی حضورآباد اسمبلی نشست کیلئے بھی پولنگ ہورہی ہے جہاں سابق وزیرصحت ایٹالہ راجندر کے استعفیٰ سے الیکشن ضروری ہوا ہے۔ وہ بی جے پی امیدوار ہے اور انہیں برسراقتدار ٹی آر ایس سے مسابقت کا سامنا ہے۔ مہاراشٹرا، ہریانہ ، راجستھان، آسام، آندھراپردیش، میگھالیہ، مغربی بنگال، میزورم، مدھیہ پردیش کے بھی مختلف حلقوں کیلئے پولنگ ہوگی۔