لکھنؤ۔ 15 اگست (یواین آئی) بہوجن سماج پارٹی (بی ایس پی) کی صدر اور اتر پردیش کی سابق وزیر اعلیٰ مایاوتی نے ہفتہ کے روز اہل وطن کو 80ویں یومِ آزادی کی دلی مبارکباد اور نیک خواہشات پیش کرتے ہوئے کہا کہ آزادی کا یہ تہوار جوش و خروش سے منانے کے ساتھ ساتھ آئینی عہدوں پر بیٹھے لوگوں کو اپنی ذمہ داریوں کے تئیں مزید محتاط رہنے کی ضرورت ہے ۔ مایاوتی نے سوشل میڈیا پر جاری کردہ اپنے پیغام میں کہا کہ عوام اپنے حقیقی ملک اور عوامی مفاد کے تئیں آئینی عہدوں پر فائز لوگوں سے صحیح اور سچے جوابدہ ہونے کی توقع اب پہلے سے کہیں زیادہ کرنے لگے ہیں۔ انہوں نے کہا کہ یومِ آزادی جیسے خاص موقع پر یہ امید کی جاتی ہے کہ ملک کے اعلیٰ ادارے آئین ہند کے ’چیک اینڈ بیلنس‘کے مقصد اور ذمہ داری کو پوری ایمانداری اور وفاداری کے ساتھ نبھائیں گے ۔ انہوں نے کہا کہ ایسا ہونے پر ہی ہندستان کے جمہوریہ ہونے کا واقعی فائدہ ملک کے کروڑوں دلتوں، آدیواسیوں، انتہائی پسماندہ طبقوں، مسلم اور دیگر مذہبی اقلیتوں سمیت معاشرے کے غریبوں، مزدوروں، کسانوں، نوجوانوں اور خواتین کو بے روزگاری اور بدعنوانی سے پاک خوشحال زندگی کی صورت میں مل سکے گا۔
