سڈنی۔10 اپریل (سیاست ڈاٹ کام) آسٹریلیا کے سابق کپتان اور اسٹیون اسمتھ نے کہا ہے کہ آسٹریلیائی ٹیم دنیا کی نمبر ایک ٹیم ہندوستان سے اس کی ہی گھر میں ٹسٹ سیریز جیتنا چاہے گی۔اسمتھ نے آئی پی ایل میں ان کی ٹیم راجستھان رائلز کی طرف سے منعقد پوڈ کاسٹ پر نیوزی لینڈ کے لیگ اسپنر ایش سودھی سے بات چیت کے دوران کہا کہ یقینی طور پر ہندوستان کے خلاف ٹسٹ سیریز جیتنا چاہتے ہیں۔ایک آسٹریلیائی کھلاڑی کے طور پر ہم ایشز سیریز، ورلڈ کپ کی بات کرتے ہیں جو بڑے مقابلے ہیں لیکن مجھے لگتا ہے کہ دنیا کی نمبر ایک ٹیم ہندستان کے خلاف اس کے ہی گھر میں کھیلنا بہت مشکل ہے۔ تو میں ہندوستان میں ٹسٹ سیریز جیتنا چاہتا ہوں۔ آسٹریلیا 2004 کے بعد سے ہندوستان میںکبھی سیریز نہیں جیت پایا ہے۔انہوں نے کہا کہ ہندوستان کو اسی کی زمین پر ٹسٹ سیریز میں شکست دینے کے علاوہ فی الحال ان کا کوئی خاص بڑا ہدف نہیں ہے لیکن سدھار یا بہتر ہونے میں متعدد سیریز اورکئی دن لگتے ہیں۔آسٹریلیا کو دراصل ہندستان سے گزشتہ گھریلو ٹسٹ سیریز میں پہلی بار 1-2 سے شکست کا سامنا کرنا پڑا تھا۔اس سیریز میں آسٹریلیائی ٹیم اسمتھ اور ڈیوڈ وارنر کے بغیر کھیلی تھی جوگیند سے چھیڑ چھاڑ کرنے کی وجہ سے ایک سال کی پابندی کا سامنا کر رہے تھے۔اسمتھ نے اس کے علاوہ بائیں ہاتھ کے ہندوستانی اسپنر رویندر جڈیجہ کی تعریف کرتے ہوئے کہا کہ جڈیجہ اپنے گھر میں بہت ہی شاندار بولنگ کرتے ہیں۔وہ اتنے متاثر کن ہیں کیونکہ وہ مسلسل اچھی جگہ پرگیند ڈالتے ہیں اور ان کی ہرگیند میں تنوع ہے جو بیٹسمین کو پریشانی میں ڈالتی ہے۔
