کاما ریڈی۔ ـ 28 اگست (سیاست ڈسٹرکٹ نیوز) ووٹر فہرست کی خصوصی جامع نظرثانی (ایس آئی آر) کے عمل کے تحت پٹلم منڈل کے بولاّک پلی اور مدّلے چروو دیہات میں جاری ایس آئی آر سماعت کے عمل کا ضلع ایڈیشنل کلکٹر وکٹر نے آج معائنہ کیا۔ پٹلم منڈل تحصیلدار اور پی ڈی سی عہدیدار کے ہمراہ ایڈیشنل کلکٹر نے دونوں دیہات میں قائم سماعت مراکز کا دورہ کرتے ہوئے سماعت کے عمل کی انجام دہی کا جائزہ لیا۔ انہوں نے نوٹس موصول ہونے والے ووٹروں کی جانب سے پیش کردہ دستاویزات اور ثبوتوں کی جانچ کی اور عہدیداروں کو ہدایت دی کہ مقررہ قواعد و ضوابط کے مطابق سماعت کا عمل مکمل شفافیت کے ساتھ انجام دیا جائے۔ اس موقع پر ایڈیشنل کلکٹر وکٹر نے کہا کہ ایس آئی آر کے عمل کے دوران اس بات کو یقینی بنایا جائے کہ ہر اہل ووٹر کا نام ووٹر فہرست میں موجود رہے اور اس سلسلہ میں عہدیدار خصوصی توجہ دیں۔ انہوں نے سماعت کے لیے آنے والے ووٹروں کو ضروری معلومات اور رہنمائی فراہم کرنے کے ساتھ ساتھ ان کے اعتراضات اور وضاحتوں کو قواعد کے مطابق ریکارڈ کرنے کی ہدایت دی۔ انہوں نے مزید کہا کہ سماعت کے عمل کو مقررہ مدت کے اندر مکمل کیا جائے اور کسی بھی قسم کی غلطی کی گنجائش نہ رکھتے ہوئے ووٹر فہرست کی نظرثانی کا عمل مستحکم اور مؤثر انداز میں انجام دیا جائے۔ اس موقع پر ٹریننگ ڈپٹی کلکٹر روی تیجا، پٹلم منڈل تحصیلدار، پی ڈی سی عہدیدار اور متعلقہ عملہ موجود تھے۔
