ممبئی12جولائی (یو این آئی) نائب وزیر اعلیٰ ایکناتھ شنڈے نے پارٹی کے اراکین اسمبلی اور وزراء کو سخت انتباہ جاری کیا ہے ۔ انہوں نے کہا کہ تنازعات کو برداشت نہیں کیا جائے گا کیونکہ اس سے پارٹی کی عوامی شبیہ کو نقصان پہنچ رہا ہے ۔خصوصاً وزیر سنجے شرسات اور رکن اسمبلی سنجے گائیکواڑ کو نشانہ بنایا ہے ، یہ دونوں حال ہی میں تنازعہ میں گھرے ہوئے ہیں۔کچھ دن قبل رکن اسمبلی سنجے گائکواڑ نے مبینہ طور پر آکاشوانی میں کینٹین کے ملازم کو ناقص کھانے پر مارا پیٹا تھا۔ عوامی غم و غصہ کے باوجود گائیکواڑ نے اپنے اقدامات کا دفاع کیا، اپوزیشن لیڈروں اور عوام کی جانب سے یکساں تنقید کی گئی۔سماجی انصاف کے وزیر سنجے شرسات بھی حال ہی میں تنقید کی زد میں آئے ، جب صرف پانچ سالوں میں ان کی مالیت میں خاطر خواہ اضافہ ہو گیا اور اس کے حوالے سے رپورٹس منظر عام پر آئیں، جس کے بعد انکم ٹیکس نے نوٹس لیا۔ یہ تنازعہ اس وقت مزید گہرا ہو گیا، جب شرسات کی بیگ کے ساتھ تصویر وائرل ہوئی۔ شرسات نے کسی غلط کام کی تردید کرتے ہوئے دعویٰ کیا ہے کہ بیگ میں کرنسی نہیں بلکہ کپڑوں سے بیگ بھرا ہوا تھا۔بڑھتے ہوئے سیاسی ردعمل اور بڑھتی ہوئی تنقید کے درمیان شنڈے نے دونوں لیڈر سے سخت ناراضگی کا اظہار کیا ہے ۔ انہوں نے پارٹی کے تمام نمائندوں کو سختی سے متنبہ کیا ہے کہ اس طرح کی بدتمیزی کو برداشت نہیں کیا جائے گا، کیونکہ اس سے شندے کی قیادت والی شیوسینا دھڑے کی شبیہ خراب ہوتی ہے ۔
