برلن ۔ 20 ڈسمبر (سیاست ڈاٹ کام) کل جمعرات کو جرمن پارلیمنٹ میں لبنانی شیعہ ملیشیا حزب اللہ پر پابندیاں عاید کرنے سے متعلق ایک بل پر رائے شماری کی گئی جس میں یہ بل بھاری اکثریت سے منظور کرلیا گیا ہے۔جرمنی کی دونوں حکمراں جماعتوں نے لبنانی حزب اللہ پر پابندیاں عائد کرنے کا مطالبہ کرتے ہوئے یورپی یونین پر بھی زور دیا ہے کہ وہ حزب اللہ کو دہشت گرد تنظیموں کی فہرست میں شامل کرے۔پارلیمنٹ میں قدامت پسند جرمن چانسلر انجیلا میرکل کی پارٹی کے ترجمان میتھیاس مڈلبرگ نے کہا ہے کہ سوشل ڈیموکریٹس پارٹی کے ساتھ مل کر حزب اللہ کے خلاف مشترکہ فیصلہ کیا جائے گا۔اْنہوں نے ایک بیان میں مزید کہا کہ حزب اللہ کی دیگر مجرمانہ کارروائیوں کے ساتھ دہشت گردی کی کارروائیوں کے لیے پوری دنیا میں فنڈز بھی جمع کیے جاتے ہیں۔مڈلبرگ کا مزید کہنا تھا کہ ہم حکومت سے جرمنی میں حزب اللہ کی تمام سرگرمیوں پر پابندی عائد کرنے کا مطالبہ کرتے ہیں۔
