واشنگٹن ۔ 21 ڈسمبر (ایجنسیز) امریکہ نے یوکرین اور روس کے درمیان جنگ کے خاتمے کیلئے براہِ راست مذاکرات کی تجویز پیش کر دی ہے۔یوکرین کے صدر ولادیمیر زیلنسکی نے کہا ہے کہ واشنگٹن نے چھ ماہ بعد پہلی مرتبہ یوکرین، امریکہ اور روس کے درمیان آمنے سامنے مذاکرات کی پیشکش کی ہے۔میڈیا کے مطابق یہ مجوزہ مذاکرات امریکی شہر میامی میں ہو سکتے ہیں جہاں یوکرینی، روسی اور یورپی سفارتی وفود جمع ہو رہے ہیں۔مذاکرات کی ثالثی امریکی صدر ڈونالڈ ٹرمپ کے خصوصی ایلچی اسٹیو وٹکوف کریں گے جبکہ ٹرمپ کے داماد جیرڈ کشنر بھی اس عمل میں شامل ہیں۔یہاں یہ تذکرہ بیجا نہ ہوگا کہ روس اور یوکرین کے درمیان تقریباً تین سال سے جنگ جاری ہے جس میں دونوں ممالک کو جانی اور مالی نقصانات کا سامنا ہے۔ امریکہ اس جنگ کو ختم کرنے کی بھرپور کوشش کررہا ہے۔