نئی دہلی: کانگریس کے سابق صدر راہول گاندھی نے کہا ہے کہ وزیر اعظم نریندر مودی کی قیادت والی مرکزی حکومت نوجوانوں کو بے روزگار کر کے کروڑوں خاندانوں کی امیدوں کو ختم کر رہی ہے اور ملک کے مستقبل کو تباہ کر رہی ہے ۔ گاندھی نے ٹویٹ کیاکہ “سوال مت پوچھیں، اپنی آواز بلند نہ کریں، پرامن احتجاج نہ کریں، نیو انڈیا میں حقوق مانگنے پر آپ کو گرفتار کر لیا جائے گا۔ یہ آمرانہ حکومت نوجوانوں کو بے روزگار بنا کر ملک کے مستقبل کو تباہ کر رہی ہے اور کروڑوں خاندانوں کی امیدوں کو توڑ رہی ہے ۔”اس کے ساتھ انہوں نے ایک ویڈیو بھی پوسٹ کی ہے جس میں پیرا ملٹری فورس میں ملازمت کے لیے 2018 میں امتحان پاس کرنے والے امیدواروں نے انصاف کا مطالبہ کرتے ہوئے 46ویں دن ناگپور سے آگرہ تک مارچ کیا جہاں انہیں چار بسوں میں ٹھونس کر مختلف ضلعوں میں چھوڑاگیا۔
