آخری دن پرینکا گاندھی کی گھرگھر مہم ‘کل رائے دہی
نئی دہلی :دہلی میں آج شام انتخابی تشہیر کا شور ختم ہو گیا لیکن اس سے قبل تمام پارٹیوں نے ووٹرس کو اپنی طرف راغب کرنے کے لیے پورا زور لگا دیا ہے۔ کانگریس جنرل سکریٹری پرینکا گاندھی بھی اپنی پارٹی کے امیدواروں کو کامیاب بنانے کی بھرپور کوششیں کر رہی ہیں۔ آج وہ جنک پورہ میں پارٹی امیدوار فرہاد سوری کی حمایت میںگھر گھر مہم چلائیں۔ اس درمیان وہ جہاں جہاں گئیں، لوگوں کی زبردست بھیڑ دیکھنے کو ملی۔پرینکا گاندھی نے جنگ پورہ میں سبزی فروشوں، پھل فروشوں، دکانداروں اور گھریلو خواتین سے ملاقات کی اور دہلی کی ترقی میں تعاون پیش کرنے کی گزارش کی۔ انھوں نے لوگوں سے ملاقات کے دوران کہا کہ وہ اسی لیڈر کو ووٹ دیں جو کام کرتے ہیں اور بھروسہ کے لائق ہیں۔ ان لوگوں کو ووٹ دینے سے پرہیز کریں جو جھوٹی تشہیر پر پیسہ خرچ کرتے ہیں۔ پرینکا نے کہا کہ کچھ لوگ عوام پر پیسہ نہیں خرچ کرتے بلکہ ٹی وی اشتہارات پر خرچ کرتے ہیں۔ اس لیے ٹی وی کو دیکھ کر ووٹ دینے سے بچیں اور اچھے لوگوں کو کامیاب بنائیں تاکہ دہلی اور یہاں کی عوام کا مستقبل سنور سکے۔پرینکا کے ذریعہ گھر گھر جا کر لوگوں سے ملاقات کا زبردست اثر دیکھنے کو مل رہا ہے۔ جنگ پورہ کی عوام نے پرینکا سے کانگریس کی حمایت کرنے کا وعدہ بھی کیا اور کہا کہ کجریوال اور بی جے پی کے جھوٹے وعدوں کو وہ اچھی طرح سمجھ چکے ہیں۔ اس مثبت رد عمل سے کانگریس بھی خوش نظر آ رہی ہے۔ اس نے سوشل میڈیا پر ایک پوسٹ بھی کیا ہے جس میں لکھا ہے کہ عوام کا بھروسہ کانگریس کے ساتھ ہے اس لیے دہلی میں کانگریس کی جیت یقینی ہے۔دہلی اسمبلی کی 70نشستوں کیلئے 5فروری کو ووٹنگ ہوگی اور 8فروری کو نتائج کا اعلان کیا جائے گا۔