حیدرآباد ،14 اگست (ایجنسیز) کنڑ اداکارہ رشیکا سنگھ نے اداکار یش کی فلم ’ٹاکسک: اے فیری ٹیل فار گرون اپس‘ میں دکھائے گئے متنازعہ عریاں منظر پر تنقیدکرتے ہوئے سوال اٹھایا ہے کہ ایسے مناظر کی ضرورت آخرکیوں پیش آئی اور فلم میں خواتین کو کس انداز میں پیش کیا گیا ہے۔فلم اور اس کے متنازعہ مناظر پر ردعمل ظاہرکرتے ہوئے رشیکا نے یش کے اس فیصلے پر سخت ناراضی کا اظہار کیا کہ انہوں نے پردے پر عریاں منظر پیش کیا۔ انہوں نے سوال کیا کہ اداکارکو اس منظر کے لیے اپنے کپڑے اتارنے کی ضرورت ہی کیوں پیش آئی۔ انہوں نے فلم میں یش کے کردار کے خواتین کرداروں کے ساتھ برتاؤ پر بھی تشویش کا اظہار کیا۔ رشیکا نے اپنی تنقیدکے دوران یش کی ذاتی زندگی کا بھی حوالہ دیا۔ انہوں نے سوال اٹھایا کہ شادی شدہ ہونے کے باوجود فلم میں یش کے کردارکو اداکاراؤں کے ساتھ چھیڑ چھاڑ کرتے ہوئے دکھانے کی ضرورت کیوں پیش آئی۔ ان کے ان تبصروں کے بعد سوشل میڈیا پر بھی بحث شروع ہوگئی ہے اور فلم میں قربت اور جنسی نوعیت کے مناظر کی عکاسی پرگفتگو مزید تیز ہوگئی ہے۔اداکارہ نے فلم میں کیارا اڈوانی کی کاسٹنگ اور ان کے کردار کی پیش کش پر بھی سوال اٹھایا۔ رشیکا نے پوچھا کہ کیارا کو بالی ووڈ سے لاکر ایسے انداز میں پیش کرنے کی ضرورت کیوں محسوس کی گئی جسے وہ قابل اعتراض سمجھتی ہیں۔ رشیکا کی تنقید کا مرکزی نکتہ تجارتی سنیما میں خواتین کی نمائندگی رہا۔ ان کے مطابق خواتین اداکاراؤں کے ساتھ زیادہ احترام کے ساتھ پیش آنا چاہیے اور ان کے کرداروں کو ایسے مناظر تک محدود نہیں کیا جانا چاہیے جنہیں وہ غیر ضروری طور پر اشتعال انگیز سمجھتی ہیں۔رشیکا نے خواتین کے احترام کی اہمیت پر زور دیتے ہوئے سخت انتباہ بھی دیا اور کہا کہ کرناٹک کے ناظرین خواتین کی بے توقیری پر مبنی پیش کش کو برداشت نہیں کریں گے۔
