نئی دہلی، 14 مئی (یو این آئی) راشٹریہ سویم سیوک سنگھ (آر ایس ایس) سے وابستہ سودیشی جاگرن منچ نے ترکی کی طرف سے پاکستان کو فوجی تعاون کی مذمت کرتے ہوئے اس پر اقتصادی پابندیوں، پروازوں پر پابندی اور سیاحت کے بائیکاٹ کی اپیل کی ہے ۔ چہارشنبہ کو یہاں جاری ایک بیان میں جاگرن منچ کے قومی شریک کنوینر اشونی مہاجن نے کہا کہ ترکی پر اقتصادی پابندیاں عائد کی جانی چاہئیں اور غیر ضروری درآمدات پر پابندی عائد کی جانی چاہئے اور بڑی ترک اشیاء جیسے ماربل، کیمیکل اور مشینری پر ہائی ڈیوٹی عائد کی جانی چاہئے ۔ ترکی کے لیے براہ راست پروازوں کو عارضی طور پر معطل کر دیا جانا چاہیے اور ہوا بازی کے ‘کوڈ شیئر’ مراعات کو منسوخ کر دینا چاہیے ۔ ہندوستانی سیاحوں کو ترکی کا سفر کرنے سے روکا جائے ۔ ہندوستانی حکومت کو ترکی کے ساتھ سفارتی تعلقات کا از سر نو جائزہ لینا چاہیے اور ثقافتی تبادلے کی سطح کو کم کرنا چاہیے ۔ جاگرن منچ نے اس بات کا اعادہ کیا کہ ہندوستان کے لوگوں کو ان ممالک کا بائیکاٹ کرنا چاہیے جو پاکستان کی جارحانہ صلاحیتوں کو بڑھانے میں فعال طور پر مدد کر رہے ہیں۔
