ممبئی : سی بی آئی نے مہاراشٹرا کے سابق وزیر داخلہ انیل دیشمکھ کے گھر کی تلاشی لی ہے۔ تفتیشی ایجنسی نے عدالت سے ان کے خلاف وارنٹ حاصل کرنے کے بعد ان کے گھر کی تلاشی لی ہے۔ دراصل تحقیقاتی ایجنسی کی طرف سے سمن جاری کرنے کے باوجود دیشمکھ نے پیش ہونے سے مسلسل گریز کیا ہے۔ اس کے بعد یہ قدم تحقیقاتی ایجنسی نے اُٹھایا ہے۔اس سے قبل سی بی آئی بھی انیل دیشمکھ کی آبائی رہائش گاہ پر ان کو تلاش کرنے پہنچی، لیکن ان کے بارے میں کچھ معلومات نہیں ملی۔ دیش مکھ مہاراشٹر میں 100 کروڑ روپئے کی وصولی کے معاملے میں ملزم ہیں۔ عدالت کے حکم پر کیس سی بی آئی کے حوالے کیا گیا۔ ممبئی کے سابق پولیس کمشنر پرمبیر سنگھ نے دیشمکھ پر وصولی کا ریکیٹ چلانے کا الزام لگایا تھا۔اس طرح کے سنگین الزامات کے بعد دیشمکھ کو مہاراشٹر کے وزیر داخلہ کے عہدے سے استعفیٰ دینا پڑا۔ تفتیشی ایجنسی نے انہیں کئی بار پوچھ تاچھ کے لیے طلب کیا تھا، لیکن وہ ایک بار بھی پیش نہیں ہوئے۔ این سی پی سربراہ شردپوار خود بھی دیشمکھ کو بچانے کے لیے آگے آئے تھے، لیکن عدالت کی جانب سے سی بی آئی انکوائری کا حکم دینے کے بعد دیشمکھ کو استعفیٰ دینا پڑا۔ انفورسمنٹ ڈائریکٹوریٹ (ای ڈی) نے این سی پی لیڈر انیل دیشمکھ کے خلاف لک آؤٹ نوٹس بھی جاری کیا ہے۔ یہ نوٹس دیشمکھ کو ملک چھوڑنے سے روکنے کے لیے جاری کیا گیا ہے۔ ای ڈی کے سمن کے باوجود دیشمکھ پیش نہیں ہوئے۔اس معاملے میں سپریم کورٹ نے دیشمکھ کو راحت دینے سے انکار کر دیا تھا۔ ای ڈی نے دیشمکھ اور دیگر کے خلاف سی بی آئی مقدمہ درج کرنے کے بعد ایسا کیا ہے۔
