کھرگون، 20جون (یواین آئی) مدھیہ پردیش کے وزیر اعلیٰ ڈاکٹر موہن یادو نے کہا کہ زندگی میں شراب سے بدتر کوئی چیز نہیں ہے ۔وزیر اعلیٰ ڈاکٹر یادو کل شام کھرگون ضلع کے برواہ اسمبلی حلقہ کے بیدیا پہنچے ۔ انہوں نے یہاں 266 کروڑ روپے کے 24 ترقیاتی کاموں کا بھی افتتاح اور بھومی پوجن کیا۔ جلسہ عام سے خطاب کرتے ہوئے انہوں نے کہا کہ زندگی میں شراب سے بدتر کوئی چیز نہیں ہو سکتی۔ انہوں نے 19 مذہبی قصبوں میں شراب پر پابندی کا ذکر کرتے ہوئے کہا کہ ریاست بتدریج نشہ سے نجات کی طرف بڑھ رہی ہے ۔
انہوں نے کہا کہ شراب بند کرنے اور دودھ کی دکانیں کھولنے کی مہم جاری ہے ۔انہوں نے کہا کہ کانگریس کے دور میں کسان کو بجلی کی کمی کی وجہ سے ایک فصل لینے میں دقت ہوتی تھی، وہیں بی جے پی کے دور میں وہ تین فصلیں لے رہا ہے ۔ انہوں نے کہا کہ ریاستی کانگریس صدر جھوٹ کا پلندہ ہے ، اسی لیے ان کا اندور سے معاملہ ہوا۔ انہوں نے کہا کہ کانگریس بھی حکومت بنانے کے لیے جھوٹ بولتی ہے ۔
