وزیر تعلیم سبیتا اندراریڈی کے ہاتھوں افتتاح
حیدرآباد۔ تلنگانہ کی وزیر تعلیم سبیتا اندراریڈی نے ریاست میں پرائیویٹ ٹیچرس کے لئے فی کس 25 کیلو چاول کی فراہمی کا آغاز کیا۔ راجندر نگر اسمبلی حلقہ کے عطاپور میں منعقدہ پروگرام میں ٹی آر ایس کے رکن اسمبلی پرکاش گوڑ کے ساتھ ساتھ پرائیویٹ اسکولس کے اساتذہ نے شرکت کی۔حکومت کی جانب سے فراہم کئے جانے والے چاول پر پرائیویٹ ٹیچرس نے مسرت کا اظہار کیا اور چیف منسٹر کے چندرشیکھرراو سے اظہار تشکر کیا۔ اس موقع پر سبیتا اندرا ریڈی نے کہا کہ ریاست میں پرائیویٹ اساتذہ کو معاشی مدد اور ان کو چاول کی فراہمی کی اسکیم کی تلنگانہ میں شروعات کی گئی ہے جس کی مثال ملک کی کسی بھی ریاست میں نہیں ملتی۔انہوں نے کہا کہ کورونا کی وجہ سے پرائیویٹ اسکولس کے اساتذہ اور دیگر غیر تدریسی اسٹاف کو کافی مشکل صورتحال کا سامنا ہے ۔ان کی مشکلات کے پیش نظر چیف منسٹر چندرشیکھرراو نے یہ فیصلہ کیا ہے ۔ انہوں نے کہا کہ گذشتہ سال جب کورونا پھوٹ پڑا تھا تو اُس وقت چندرشیکھرراو،نقل مکانی کرنے والے مزدوروں کے ساتھ کھڑے تھے ۔ انہوں نے ان کو مالی مدد کی تھی اور ان کو راشن کا چاول بھی مفت فراہم کیاتھا۔انہوں نے کہا کہ پرائیویٹ ٹیچرس کو درپیش مسائل اور مشکلات کے پیش نظر اس مرحلہ میں ایک لاکھ 24ہزار اساتذہ کو 25کیلوچاول فراہم کیا جارہا ہے ۔گذشتہ روز ایک ہی دن میں ایک لاکھ 12ہزار پرائیویٹ ٹیچرس کے بینک کھاتوں میں فی کس دو ہزار روپئے جمع کروائے گئے ۔انہوں نے امید ظاہر کی کہ ریاست کے عوام کے آشیرواد سے وزیراعلی کے چندرشیکھر راوجلد صحت یاب ہوں گے ۔سبیتااندراریڈی نے پرائیویٹ ٹیچرس کی طرف سے وزیراعلی کا شکریہ ادا کیا۔تلنگانہ کے پرائیویٹ اسکولوں میں کام کرنے والے اساتذہ اور غیر تدریسی عملہ کے1,18,004 افراد کو امداد کے لئے منتخب کیا گیا۔ ان میں سے 1,06,383 اساتذہ اور 11,621 غیر تدریسی اسٹاف شامل ہے ۔ حکام کا اندازہ ہے کہ یہ تعدادبڑھ سکتی ہے ۔ منگل سے منتخب افراد کو دو ہزار روپے نقد رقم بینک کھاتوں میں جمع کروانے کا عمل شروع کیاگیا۔ واضح رہے کہ چیف منسٹر نے کورونا کے تناظر میں مالی پریشانیوں کا سامنا کرنے والے پرائیویٹ ٹیچرس اور پرائیویٹ غیر تدریسی عملہ کو 2 ہزار روپے نقد اور 25 کلو چاول دیئے کا اعلان کیا تھا۔ اس تناظر میں محکمہ تعلیم کے عہدیداروں نے آن لائن درخواستیں وصول کی تھیں جس کے بعد مستفید افراد کے انتخاب کا عمل مکمل کیا گیا۔