اپوزیشن پارٹیوں کو متحد رہنے کی ضرورت : نتیش… بی جے پی سے کچھ بھی ممکن: ممتا
پٹنہ / کولکاتا: چیف منسٹرمغربی بنگال ممتا بنرجی نے جب سے یہ بیان دیا ہے کہ لوک سبھا انتخابات وقت سے پہلے ہو سکتے ہیں، سیاسی سرگرمیاں بڑھ گئی ہیں۔اب بہار کے چیف منسٹر نتیش کمار نے بھی کچھ اسی طرح کا امکان ظاہر کیا ہے۔ نتیش کمار نے آج اپنے ایک بیان میں کہا کہ مرکز کی بی جے پی حکومت قبل از وقت لوک سبھا الیکشن کرا سکتی ہے۔ایک تقریب میں نالندہ پہنچے نتیش کمار نے صحافیوں سے بات کرتے ہوئے کہا کہ انتخاب کبھی بھی ہو سکتا ہے۔ انھوں نے کہا کہ یہ کوئی ضروری نہیں کہ انتخاب وقت پر ہو، مرکز والے پہلے بھی کرا سکتے ہیں۔یہ بات ہم سات آٹھ ماہ سے کہہ رہے ہیں کہ یہ لوگ پہلے بھی انتخاب کرا سکتے ہیں، اس لیے اپوزیشن کو متحد ہونا چاہیے۔اپوزیشن اتحاد ’اِنڈیا‘ کے بارے میں ایک سوال کے جواب میں نتیش کمار نے کہا کہ میری کوئی ذاتی خواہش نہیں ہے۔ ہمارا مقصد ہے کہ سب لوگ متحد ہوں۔ اپوزیشن پارٹیوں کے اتحاد کی ممبئی میں ہونے والی میٹنگ میں نئی پارٹیوں کے شامل ہونے کے تعلق سے نتیش کمار کا کہنا ہے کہ ابھی کچھ بھی کہنا مناسب نہیں۔ دریں اثناء کولکاتا میںچیف منسٹر ممتا بنرجی نے خدشہ ظاہر کیا ہے کہ بی جے پی اگلے لوک سبھا انتخابات رواںسال ڈسمبر یا اگلے سال جنوری میں کرا سکتی ہے۔ انہوں نے یہ بھی دعویٰ کیا کہ مرکزی حکومت الیکشن کمیشن آف انڈیا کے آئین کو کنٹرول کرنے کی کوشش کر رہی ہے۔’ترنمول چھاتر پریشد‘ کی تقریب سے خطاب میںممتا نے کہا کہ مجھے خدشہ ہے کہ لوک سبھا کے لیے پولنگ قبل از وقت ہوسکتی ہے۔