کانگریس قائد شکیل احمد خان کے بیٹے کی خودکشی کی

   

پٹنہ :بہار میں کانگریس قانون ساز پارٹی کے قائد شکیل احمد خان کے بیٹے نے خودکشی کر لی ہے۔ پٹنہ سکریٹریٹ علاقے میں واقع سرکاری رہائش پر خودکشی کا یہ افسوسناک معاملہ پیش آیا۔ شکیل احمد خان کے بیٹے کا نام ایان تھا اور ان کی عمر تقریباً 18 سال تھی۔ اس نے اپنے والد کے فلیٹ میں خودکشی کی۔ اس وقت کانگریس قائد شکیل خان بہار سے باہر تھے۔ اس خودکشی نے سبھی کو ہلا کر رکھ دیا ہے۔ سکریٹریٹ تھانہ کی پولیس نے نعش کو حاصل کرکے آگے کی کارروائی شروع کر دی ہے۔میڈیا رپورٹ کے مطابق ایان رات کے کھانے کے بعد اپنے کمرے میں سونے کے لیے چلے گئے تھے۔ صبح ان کی نعش پھندے سے جھولتی ہوئی ملی۔ شکیل احمد خان کے بیٹے نے خودکشی کیوں کی؟ ابھی اس کے بارے میں تفصیلی جانکاری سامنے نہیں آئی ہے۔ اس واقعہ کے بعد پورے خاندان میں ماتم کا ماحول ہے۔بنیادی طور سے بہار کے کٹیہار ضلع کے رہنے والے شکیل احمد خان کی شبیہہ ایک صاف ستھرے رہنما کی رہی ہے۔ اچانک ان کے بیٹے کے خودکشی کر لینے کے بعد پولیس جانچ پڑتال میں لگ گئی ہے۔ اطلاع کے مطابق واقعہ کی خبر ملنے پر بڑے افسر بھی موقع پر پہنچ گئے تھے۔ میڈیا رپورٹ میں یہ بھی کہا جا رہا ہے کہ فارنسک محکمہ کی ٹیم نے بھی جائے وقوع پر جا کر اپنی جانچ کی ہے۔ ایان شکیل خان کے واحد لڑکے تھے اس کے علاوہ ان کی ایک بیٹی بھی ہے جو انگلینڈ میں قانون کی پڑھائی کر رہی ہے۔کانگریسی رہنما کے بیٹے کی موت پر کئی سیاسی رہنماؤں نے تعزیت کا اظہار کیا ہے۔ ان میں پورنیہ سے آزاد ایم پی پپو یادو نے افسوس کا اظہار کرتے ہوئے کہا ہے کہ میں کافی غمزدہ ہوں۔ میری تعزیت شکیل بھائی اور ان کے اہل خانہ کے ساتھ ہے۔ وہیں بی جے پی رہنما شاہنواز خان بھی اس واقعہ کی خبر ملنے کے بعد تعزیت کرنے کیلئے شکیل خان کے گھر پہنچے۔