نندی ہلز، 2 جولائی (یو این آئی) کرناٹک میں قیادت کی تبدیلی کی قیاس آرائیوں کے درمیان چیف منسٹر سدارمیا نے آج دہرایا کہ وہ اپنی پانچ سالہ میعاد پوری کریں گے ۔یہاں نامہ نگاروں سے بات کرتے ہوئے سدارمیا نے ریاست کی اعلیٰ قیادت میں ممکنہ تبدیلی کے بارے میں سوالوں کے جواب میں کہا کہ ہاں، میں وزیر اعلیٰ کے طور پر برقرار رہوں گا۔ آپ اس پر شک کیوں کر رہے ہیں؟دوسری طرف کانگریس کے سینئر لیڈر اور ایم ایل اے اقبال حسین نے عوامی طور پر ڈپٹی چیف منسٹر ڈی کے شیوکمار سے اگلے دو ماہ میں چیف منسٹر کا عہدہ سنبھالنے کی اپیل کی ہے ۔ایک اور سوال کے جواب میں سدارمیا نے کہا کہ جمہوریت میں ہر کوئی وزیر بننے کی خواہش رکھتا ہے ۔ یہ حتمی فیصلہ ہائی کمان کرتی ہے ۔ ہماری پارٹی کے 142 ایم ایل اے ہیں، ان میں سے صرف 34 کو وزیر بنایا جا سکتا ہے ۔ کیا سبھی 142 وزیر بن سکتے ہیں؟ صرف 15 فیصد کو ہی شامل کیا جا سکتا ہے۔ حسین، جو تین بار ایم ایل اے رہ چکے ہیں اور شیوکمار کے قریبی ہیں، نے ڈپٹی چیف منسٹر کو اعلیٰ عہدہ پر پہنچانے کی پرزور وکالت کی ہے۔
انہوں نے دلیل دی کہ کانگریس پارٹی کی بقا اور 2028 کے اسمبلی انتخابات میں اس کے امکانات کا انحصار اس بات پر ہے کہ 2023 کے انتخابات کے بعد اقتدار کی تقسیم کے معاہدے کو کس طرح نافذ کیا جاتا ہے ۔
