ڈھاکہ۔ 7 ستمبر (آئی اے این ایس) ہندوستان کے بنگلہ دیش میں ہائی کمشنر دنیش ترویدی نے پیر کے روز ڈھاکہ میں بنگلہ دیش کی وزیر اعظم کے مشیر برائے وزارتِ عوامی انتظامیہ اسماعیل زبیح اللہ سے ملاقات کی۔ اس دوران دونوں فریقوں نے دوطرفہ تعلقات سے متعلق مختلف امور پر تفصیلی تبادلہ خیال کیا۔ ملاقات کے دوران عوام سے عوام کے روابط کو ہندوستان۔بنگلہ دیش تعلقات کی بنیاد قرار دیتے ہوئے اس کی اہمیت پر زور دیا گیا۔ دونوں جانب سے اس امید کا اظہار کیا گیا کہ باہمی اعتماد اور باہمی مفاد پر مبنی مستقبل پر نظر رکھنے والی شراکت داری کے ذریعہ دوطرفہ تعاون کو مزید آگے بڑھایا جائے گا۔ ڈھاکہ میں ہندوستانی ہائی کمیشن نے سوشل میڈیا پلیٹ فارم ایکس پر ایک پوسٹ میں کہا بات چیت میں اس بات پر زور دیا گیا کہ عوام سے عوام کے تعلقات دوطرفہ روابط کی بنیاد ہیں۔ ملاقات میں ہندوستان۔بنگلہ دیش تعلقات سے متعلق مختلف موضوعات پر تبادلہ خیال کیا گیا اور اس امید کا اظہارکیا گیا کہ دونوں خودمختار ممالک باہمی اعتماد اور باہمی مفاد کی بنیاد پر مستقبل پر مبنی نقطہ نظر کے ساتھ مل کر کام جاری رکھیں گے۔ بعد ازاں ہائی کمشنر دنیش ترویدی نے بنگلہ دیش کے وزیر ماحولیات، جنگلات اور موسمیاتی تبدیلی عبدالاوال منٹو سے بھی ملاقات کی۔ہائی کمیشن نے کہا کہ ملاقات میں جنگلی حیات کے تحفظ اور قدرتی مسکن کے تحفظ کے شعبوں میں دوطرفہ تعاون کے طریقہ کار میں ہونے والی پیش رفت کا جائزہ لیا گیا۔ اس کے علاوہ سرحد پار آلودگی، کچرے کے انتظام اور باہمی دلچسپی کے دیگر ماحولیاتی امور پر تعاون کو مزید مضبوط بنانے کے امکانات پر بھی تبادلہ خیال کیا گیا۔ملاقات کے دوران ریاستی وزیر شیخ فریدالاسلام بھی موجود تھے۔اس سے ایک روز قبل اتوارکو دنیش ترویدی نے بنگلہ دیش کے وزیر برائے ثقافتی امور نتائی رائے چودھری سے ملاقات کی۔
