لندن ۔انگلینڈ کی کرکٹ ٹیم کے سابق کپتان مائیکل وان نے انگلینڈ اور ہندوستان کے درمیان سیریز کا آخری ٹسٹ مسنوخ ہونے کی وجہ ہندوستانی کرکٹ لیگ آئی پی ایل کو قرار دے دیا۔ اپنے بیان میں مائیکل وان نے کہا کہ اس ٹسٹ کی منسوخی کی وجہ آئی پی ایل کے سوا کچھ نہیں ہے۔ خیال رہے کہ ہندوستان میں کورونا وائرس کے بڑھتے ہوئے معاملات کے بعد جہاں معمولاتِ زندگی بری طرح متاثر ہوئے وہیں کھلاڑیوں میں کورونا وائرس کے معاملات بڑھ جانے کے خدشات کی وجہ سے آئی پی ایل کو منسوخ کرنا پڑگیا تھا۔ بعد میں آئی پی ایل انتظامیہ نے ایونٹ کے بقیہ میچزکروانے کے لیے متحدہ عرب امارات (یو اے ای) کا انتخاب کیا جہاں اس ایونٹ کے بقیہ میچز ایک ہفتے بعد ہی شروع ہونے جارہے ہیں۔مائیکرو بلاگنگ ویب سائٹ ٹوئٹر پر بیان میں مائیکل وان نے بین الاقوامی کرکٹ سیریز کی منسوخی کی وجہ کھل کر بتائی۔ انہوںنے کہا ہے کہ آئی پی ایل میں شامل کھلاڑی اور عملہ کے ارکان روانہ ہو رہے ہیں، متحدہ عرب امارات میں 6 دن کے قرنطینہ کی شرط ہے جبکہ ایونٹ کے بقیہ میچزکے آغاز میں صرف 7 روز باقی ہیں۔ انہوں نے کہا کہ مجھے یہ نہ کہیں کہ انگلینڈ اور ہندوستان کے درمیان ٹسٹ میچ آئی پی ایل کے سوا کسی دوسری وجہ سے منسوخ ہوا ہے۔ یادر ہے کہ ہندوستانی کرکٹ ٹیم کے عملہ کے کورونا سے متاثر ہونے کے بعد پانچواں ٹسٹ مسنوخ کردیا گیاہے ۔
