روہت شرما کی ٹیم 121/3 سے 155 آل آؤٹ ۔ کیپٹن کمنس کو میچ ایوارڈ ۔ آسٹریلیا کو سیریزمیں2-1 کی سبقت
ملبورن: کپتان پیاٹ کمنز اور اسکاٹ بولینڈ (تین ، تین وکٹ) کی شاندار گیند بازی کی بدولت آسٹریلیا نے چوتھے ٹسٹ کے آخری دن پیر کو یہاں ایم سی جی میں ہندوستان کو 184 رن سے شکست دے کر پانچ میچوں کی سیریز میں 2-1 کی ناقابل شکست برتری حاصل کر لی۔چائے کے وقت ہندوستان 112/3 کی اچھی پوزیشن میں تھا۔ یشسوی جیسوال اور رشبھ پنت کی جوڑی بڑے اسکور کی طرف بڑھ رہی تھی۔ تبھی 59ویں اوور میں ٹراویس ہیڈ نے پنت کو مارش کے ہاتھوں کیچ آؤٹ کروا کر ہندوستان کو چوتھا جھٹکا دیا۔ پنت نے 30 رن بنائے ۔ میچ میں دوسری بار بھی انہوں نے غیرذمہ داری سے اپنی وکٹ گنوائی۔ اس کے بعد وکٹوں کی جھڑی لگ گئی۔ انڈیا نے 34 رن میں 7 وکٹ گنوائے۔ 63ویں اوور میں رویندر جڈیجہ (2) کو بولینڈ نے الیکس کیری کے ہاتھوں کیچ کراکر آسٹریلیا کو پانچویں کامیابی دلوائی۔ ساتویں وکٹ کے طور پر یشسوی جیسوال (84)کے آؤٹ ہونے کے بعد میچ مکمل طور پر ہندوستان کے ہاتھ سے نکل گیا۔ ہندوستان کی طرف سے صرف دو بلے باز جیسوال اور پنت ڈبل فیگر تک پہنچ سکے جبکہ 12رنز اضافی ملے ۔ کپتان روہت شرما (9) اور کے ایل راہل (0) اور ویراٹ کوہلی (5) معمولی اسکور پر آؤٹ ہوئے۔ پہلی اننگز میں سنچری بنانے والے نتیش کمار ریڈی دوسری اننگز میں صرف ایک رن بنا سکے۔ دیگر بلے بازوں میں آکاش دیپ (7)، جسپریت بمراہ (صفر)، محمد سراج (صفر) بھی جلد آؤٹ ہوگئے جبکہ واشنگٹن سندر 5 رن بنا کر ناٹ آؤٹ رہے ۔ آسٹریلیائی بالنگ اٹیک کے سامنے ہندوستانی ٹیم 79.1 اوور میں 155رن پر ڈھیر ہوگئی۔ آسٹریلیا نے 12 سال بعد ہندوستان سے باکسنگ ڈے ٹسٹ جیتا ہے ۔ اس جیت کے ساتھ ہی آسٹریلیا کی ڈبلیو ٹی سی فائنل میں پہنچنے کی امیدیں بڑھ گئیں۔آسٹریلیا کی جانب سے کیپٹن کمنز اور بولینڈ کے علاوہ نیتھن لیون نے دو، مچل اسٹارک اور ہیڈ نے ایک، ایک وکٹ لی۔پہلی اننگز میں 49رن اور تین وکٹ اور دوسری اننگز میں تین وکٹ کے ساتھ 41 رن بنانے والے پیاٹ کمنز کو ’پلیئر آف دی میچ‘ ایوارڈ سے نوازا گیا۔ صبح کے سیشن میں بمراہ نے دوسرے ہی اوور میں لیون (41)کو آؤٹ کرکے آسٹریلیا کی دوسری اننگز کا خاتمہ کیا۔ آسٹریلیا نے 234 رن بنائے۔ انڈیا کے اسٹرائیک بولر بمراہ نے پانچ وکٹ حاصل کئے۔ محمد سراج نے تین وکٹیں لئے جبکہ رویندر جڈیجہ نے ایک بلے باز کو آؤٹ کیا۔ آسٹریلیا نے پہلی اننگز میں 474 رن بنائے تھے ۔ اس کے جواب میں نتیش کمار ریڈی کی سنچری کی بدولت ہندوستان نے پہلی اننگز میں 369رن بنائے تھے۔ اب پانچواں اور آخری ٹسٹ 3 جنوری سے سڈنی میں کھیلا جائے گا۔
