یشسوی اورکنگ کوہلی کی شاندار سنچریاں، دوسری اننگز میںآسٹریلیا محض12/3
بارڈر-گواسکر ٹرافی
پرتھ :آسٹریلیا میں جاری بارڈر۔گواسکر ٹرافی کے پہلے ٹسٹ میچ کی دوسری اننگز میں پہلے یشسوی جیسوال اور اس کے بعد وراٹ کوہلی نے شاندار سنچری اسکور کی۔ کافی عرصے سے خراب فارم میں چل رہے ویراٹ کوہلی نے پہلی اننگ میں محض 5 رنز بنائے تھے لیکن دوسری اننگز میں شاندار واپسی کرتے ہوئے ناقابلِ شکست 100 رنز کی اننگ کھیلی۔اسطرح ٹسٹ میاچ پر ہندوستان کی گرفت مضبوط ہوگئی ہے اور جیت یقینی معلوم ہوتی ہے۔تیسر ے دن کے کھیل کے اختتام پرمیزبان آسٹریلیا کی حالت بہت خراب رہی اور اس نے دوسری باری میں محض12رنز اسکور کئے اور اس کے تین کھلاڑی پویلین لوٹ چکے تھے۔ جیت کیلئے آسٹریلیا کو522رنز کی ضرورت ہے ۔ قبل ازیں ہندوستانی بلے بازوں نے مجموعی طور پر بہترین کارکردگی کا مظاہرہ کیا اور ہندوستانی اوپنر یشسوی جیسوال نے بین الاقوامی کرکٹ میں اپنی شاندار کارکردگی کو جاری رکھتے ہوئے اتوار کو آسٹریلیا کے خلاف سنچری بنا کر ریکارڈوں کے ساتھ ملک کے چند بہترین کھلاڑیوں میں اپنا نام درج کرا لیا۔اوپننگ کرنے آئے کے ایل راہول اور نوجوان بلے باز یشسوی جیسوال نے 201 رنز کی شاندار شراکت داری قائم کی۔ راہول نے 77 رنز کی عمدہ اننگ کھیلی جبکہ یشسوی جیسوال نے تاریخی 161 رنز بنا کر اپنی موجودگی کا بھرپور احساس دلایا۔وراٹ کوہلی جنہیں کرکٹ کی دنیا میں ’کنگ کوہلی‘ کے نام سے جانا جاتا ہے نے 30ویں سنچری اسکور کی۔ ٹسٹ میں ان کی آخری سنچری جولائی 2023 میں ویسٹ انڈیز کے خلاف تھی۔ اس شاندار اننگ میں کوہلی نے 143 گیندوں کا سامنا کیا جس میں 8 چوکے اور 2 شاندار چھکے شامل تھے۔ کوہلی کے 100 رنز مکمل ہونے کے بعد کپتان جسپریت بمراہ نے 6/487 کے بڑے اسکور پر اننگ ڈیکلیئر کر دی اور آسٹریلیا کو پہلی اننگ کی برتری کی بنیاد پر 534 رنز کا انتہائی مشکل نشانہ دیا۔میچ کے تیسرے دن کے اختتام تک آسٹریلیا نے 12 رنز کے معمولی اسکور پر اپنے تین اہم وکٹ گنوا دیے۔ چوتھے دن کے کھیل میں ہندوستانی ٹیم کے ایک بڑی جیت حاصل کرنے کے قوی امکانات ہیں۔یشسوی جیسوال کی آسٹریلیا کی سرزمین پر پہلی اور ٹسٹ کرکٹ میں چوتھی سنچری اسکور کی۔ انہوں نے اپنی یہ سنچری 205 گیندوں میں چھکا لگا کرمکمل کی جس میں تین چھکے اور آٹھ چوکے شامل ہیں۔ اس کے ساتھ ہی وہ آسٹریلیا میں سنچری بنانے والے سنیل گواسکر (1977)، سچن ٹنڈولکر (1992) اور وراٹ کوہلی (2018)، کے ایل راہل (2014/15) کے بعد اگلی نسل کے بلے باز بن گئے ہیں۔یشسوی جیسوال پہلے 15 ٹسٹ میں 1500 رنز بنانے والے پہلے ایشیائی بلے باز بن گئے ہیں۔ وہ چیتشور پجارا کے بعد 1500 ٹسٹ رنز بنانے والے دوسرے سب سے تیزرنز بنانے والے ہندوستانی کھلاڑی ہیں۔ یشسوی جیسوال اور کے ایل راہل نے 201 رنز کی شراکت قائم کر کے ایک نیا کارنامہ انجام دیا ہے۔ دونوں بلے بازوں کے درمیان (جنوبی افریقہ، انگلینڈ، نیوزی لینڈ، آسٹریلیا) ممالک میں ہندوستان کے لیے تیسری سب سے بڑی اوپننگ شراکت داری ہے۔