150 میٹر سڑک بہہ گئی‘ کئی شاہراہیں بند‘ عام زندگی درہم برہم‘ مزید بارش کی پیش قیاسی
دہرادون: اتراکھنڈ میں جمعہ کی دیر رات سے مسلسل بارش ہو رہی ہے، جس کے سبب دریا خطرہ کے نشان سے او پربہہ رہی ہیں۔ کئی مقامات پر بادل پھٹنے کے واقعات بھی پیش آئے ہیں جبکہ لینڈ سلائیڈنگ کے باعث کئی قومی شاہراہوں کے ایک حصے سمیت کئی سڑکیں بہہ گئی ہیں۔رپورٹ کے مطابق پتھورا گڑھ ضلع کے بنگاپانی میں بارش کی وجہ سے نالے ابل پڑے اور تیز بہاؤ کے سبب 150 میٹر سڑک بہہ گئی۔ یہ سڑک بنگاپانی کو جاراجیبالی سے جوڑتی ہے۔ محکمہ موسمیات نے سات اضلاع کے لیے اورنج الرٹ جاری کیا ہے۔ اندازہ لگایا گیا ہے کہ ہریدوار، اترکاشی، ٹہری، پوڑی، دہرادون، پتھوراگڑھ، باگیشور اور چمپاوت میں زبردست بارش ہو سکتی ہے۔اترکاشی میں موسلادھار بارش کی وجہ سے بجلی ترسیل متاثر ہوئی ہے۔ بڑکوٹ کے قریب راجتر گنگنانی علاقے میں بارش سے کافی نقصان ہونے کا خدشہ ہے۔ سڑک بند ہونے کی وجہ سے ابھی تک اس کا اندازہ نہیں لگایا جا سکا۔ اطلاعات کے مطابق موسلا دھار بارش سے نظام زندگی درہم برہم ہو کر رہ گیا ہے۔اترکاشی میں موسلادھار بارش نے وادی جمنا میں تباہی مچا دی۔ فی الحال جانی و مالی نقصان کے بارے میں کوئی اطلاع نہیں ہے۔ میڈیا رپورٹس کے مطابق ملبے کے باعث 85 سے زائد رابطہ راستے بند ہو گئے ہیں۔ اس کے علاوہ 200 سے زائد دیہات کا رابطہ منقطع ہو گیا ہے۔ وہیں، ہلدوانی-نینی تال قومی شاہراہ بھاری لینڈ سلائیڈنگ کی وجہ سے بند کر دی گئی ہے۔پہاڑوں پر مسلسل بارش اور سری نگر ڈیم سے چھوڑے جانے والے پانی کی وجہ سے گنگا کی پانی کی سطح مسلسل خطرے کے نشان کو چھو رہی ہے۔ ہریدوار ضلع کے ایک بڑے علاقے میں پانی نظر آ رہا ہے۔ گنگا کے پانی کی بڑھتی ہوئی سطح لوگوں کو خوفزدہ کر رہی ہے۔ ہریدوار میں گنگا فی الحال خطرے کے نشان سے ایک میٹر نیچے ہے لیکن نشیبی علاقوں میں سیلاب کا پانی پھیل گیا ہے۔ گنگا میں معاون ندیوں سے پانی مسلسل آ رہا ہے۔ اس کے پیش نظر این ڈی آر ایف کی ٹیم کو الرٹ پر رکھا گیا ہے۔