لکھنؤ : طلبہ کے طویل مطالبات کے بعد آخر کار یوپی پبلک سروس کمیشن نے
2018-UP-PCSکے حتمی نتائج کا اعلان کر دیا ہے۔ کمیشن نے اپنے نتائج میں 976 امیدواروں کو کامیاب قرار دیا ہے۔ اس بار کے نتائج میں مسلم امیدواروں کی کار کردگی معمول کی مطابق ہی رہی ہے۔ یو پی۔ پی سی ایس میں 33 مسلم امید واروں نے اپنی کامیابی درج کرائی ہے۔ اس میں 5 مسلم امید واروں کو ایس ڈی ایم کے عہدے کیلئے منتخب کیا گیا ہے جبکہ چار امید واروں کو ڈپٹی ایس پی کی رینک دی گئی ہے۔ یوپی پبلک سروس کمیشن کے کنٹرو لر (امتحانات) اروند کمار مشرا کی طرف سے نتائج کا اعلان کیا گیا۔ جاری نتائج میں فرمان احمد خان نے میرٹ لسٹ میں 6 ویں پوزیشن حاصل کی ہے۔ فرمان احمد خان کے علاوہ ایس ڈی ایم کے زمرے میں عباس حسن نقوی، معاذ اختر ، محمد شمس تبریز، کہکشاں انجم نے کامیابی حاصل کی ہے۔ ڈی ایس پی کے زمرے میں سید اریب احمد ، عبد السلام خان ، محمد شمیم قریشی اور ضیا الدین احمد کے نام شامل ہیں۔ واضح رہے کہ طلبہ کی طرف سے یو پی۔ پی سی ایس 2018ء کے حتمی نتائج کو جاری کرنے کا مطالبہ کافی عرصے سے کیا جا رہا تھا۔ پی سی ایس کے نتائج جاری کرنے کی مانگ کو لے کر طلبہ نے کئی مرتبہ سڑکوں پراحتجاجی مظاہرہ بھی کیا۔ اس سلسلے میں کچھ طلبہ نے الہ آباد ہائی کورٹ کا رخ کیا۔ الہ آباد ہائی کورٹ نے ریاستی حکومت کو پی سی ایس کے نتائج جاری کرنے کا حکم دیا تھا۔ ہائی کورٹ کے حکم کے بعد یو پی پبلک سروس کمیشن نے نتائج کا اعلان کیا ہے۔یو پی۔ پی سی ایس کے مختلف زمروں میں جن مسلم امیدواروں نے اپنی کامیابی درج کرائی ہے ان کے نام یہ ہیں۔اکسیر خان ، محمد صبورخان ، آفتاب عالم ، محمد جاوید ، اریب صغیر ، طاہراحمد ماجد ، ممتاز احمد ، محمد عارف ، ضمیر حسن ، شبستاں عترت ، شمامہ حسین ، شہباز خان ، محمد ممتاز ، محمد کوثر نورانی ، ظفر حیدر ، ریشما ںآرا ، ارم ، عذر اء بی ، شباب الدین صدیقی ، اسد خان ، محمد ظفر انصاری ، محمد ناصر ، آفرین فاطمہ ، کمال صدیقی۔
