بیروت: لبنان کی جنوبی سرحد اسرائیلی فوج اور حزب اللہ کے درمیان باہمی جھڑپوں کا میدان بنی ہوئی ہے۔جب سے حماس نے 7 اکتوبر کو اسرائیل پر حملہ کیا تو اس کے بعد لبنان اسرائیل سرحد بھی کشیدگی کی لپیٹ میں آگئی تھی۔پیر کو اسرائیلی فوج نے اعلان کیا کہ اس نے لبنان میں حزب اللہ کے ہتھیاروں کے ذخیرہ کرنے والی ایک تنصیب کو نشانہ بنایا ہے۔ اس سے قبل حزب اللہ کے جنگجوؤں نے عرب العرامشہ کے مقام پر اسرائیلی فوج کی چوکیوں پر مارٹر گولے داغے تھے۔اس نے تل حائی، کریات شمونہ اور اس سے منسلک مقام شتولا کی جانب گولہ باری کی نشاندہی کی گئی جبکہ اسرائیلی فوج نے جوابی کارروائی میں لبنان میں گولہ بارود کے ذرائع کو نشانہ بنایا۔اسرائیلی فوج نے دعویٰ کیا کہ اس نے توپ خانے سے لبنانی حدود کے اندر متعدد مقامات پر بمباری کی۔یہ بات اس وقت سامنے آئی ہے جب اسرائیلی فوج کے ترجمان اویچائی ادرعی نے پیر کو کہا تھا کہ لبنانی سرزمین سے مارٹر حملے کے نتیجہ میں سرحدی فوجی مقام پر موجود 3اسرائیلی فوجی معمولی زخمی ہوئے ہیں۔ادرعی نے ’’ایکس‘‘ پلیٹ فارم پر اپنے اکاؤنٹ کے ذریعے کہا کہ فوجی دستوں نے بمباری کا جواب بمباری سے دیا اور حزب اللہ کے اسلحہ ڈپو کو نشانہ بنایا گیا۔
