نیویارک ۔ اقوام متحدہ میں ایران کے سفارتی مشن نے اعلان کیا ہے کہ اس نے سلامتی کونسل کے صدر کو ایک مکتوب بھیجا ہے، جس میں انہیں ایرانی نیوکلیر پروگرام کے خلاف اسرائیلی دھمکیوں پر صہیونی ریاست کے خلاف شکایت کی گئی ہے۔اپنے مکتوب میں ایرانی مندوب نے کہا کہ تہران کے خلاف اسرائیلی دھمکیاں بین الاقوامی قوانین کی سنگین خلاف ورزیوں کا ثبوت ہیں۔ مکتوب میں کہا گیا ہے کہ اسرائیل نے ایرانی سائنسدانوں اور نیوکلیر مراکز کے خلاف اور علاقے میں تجارتی جہازوں پر حملوں کے علاوہ ایران کے خلاف ان گنت کھلے اور خفیہ اقدامات کیے ہیں۔ مشن نے اسرائیل کی کسی بھی ممکنہ مہم جوئی کے خلاف خبردار کرتے ہوئے کہا کہ تہران اسرائیل کی طرف سے کسی بھی خطرے کا جواب دینے کا فطری حق رکھتا ہے۔ دوسری جانب ایران کی سپریم نیشنل سیکورٹی کونسل کے سربراہ علی شام خانی کا کہنا ہے کہ امریکی صدر کا بیان ایران کو غیر قانونی طور پر دھمکانے کے مترادف ہے۔ اپنے بیان میں علی شام خانی نے کہا کہ دوسرے متبادل استعمال کرنے پر زور دینا کسی ملک کو غیر قانونی طور پر دھمکانا ہے۔
