تل ابیب: اسرائیل کے ویسٹ بینک کے نزدیک اسرائیلی فوجیوں کے ساتھ تصادم میں 3 شہید اور پچاس سے زیادہ فلسطینی زخمی ہوگئے ہیں۔فلسطین ریڈ کریسنٹ نے چہارشنبہ کو یہ اطلاع دی۔ انہوں نے بتایا کہ ویسٹ بینک میں نبلس شہر کے نزدیک بورکا اور بیئت علاقہ میں اسرائیلی فوج کے ساتھ منگل کی رات ہوئے تصادم میں 53فلسطینی زخمی ہوگئے تھے ۔ خیال رہے کہ زخمیوں میں سے دو لوگو ں کو گولی لگی ہے جبکہ دیگر آنسو گیس سے متاثرہیں۔اسرائیلی فورسز نے دن دیہاڑے کارروائی کرتے ہوئے 3 فلسطینیوں کو شہید کردیا، اسرائیل کی جانب سے انہیں ’دہشت گرد سیل‘ قرار دیا گیا ہے۔واقعے میں مغربی کنارے پر موجود مقتولین کی گاڑی کو گولیوں سے چھلنی کردیا گیا۔ ذرائع ابلاغ کے مطابق اسرائیلی وزیر دفاع بینی گینٹز نے کارروائی کو سراہتے ہوئے کہا کہ انہوں نے مغربی کنارے میں حالیہ فائرنگ کی وجہ سے انسداد دہشت گردی کی سرگرمیوں میں اضافے کا حکم دیا ہے۔مغربی کنارہ (ویسٹ بینک) فلسطینی زمین ہے جس پر اسرائیلی فوج نے 1967 میں ہونے والی 6 روزہ جنگ میں قبضہ کیا تھا۔فلسطینی وزارت صحت اور اسرائیلی فورسز کی جانب سے 3 ہلاکتوں کی تصدیق کی گئی ہے۔ فلسطینی حکام نے اسرائیلی کارروائی کی مذمت کرتے ہوئے اسے ’مقدمے کی مناسب کارروائی کے بغیر پھانسی‘ قرار دیا ہے۔ اسرائیلی پولیس کا کہنا ہے کہ جاں بحق ہونے والے تینوں افراد اسرائیلی فوجیوں اور شہریوں پر حملے کے ذمہ دار تھے، واقعے میں کسی اسرائیلی کو کوئی نقصان نہیں پہنچا۔فلسطینی تحریک فتح میں موجود ذرائع کا کہنا تھا کہ 2 افراد کی شناخت اَدھم مبروک اور محمد الدَخیل کے نام سے کی گئی ہے، ان کا تعلق عسکریت پسند الاقصیٰ شہدا بریگیڈز سے تھا۔
