کوچ بہار مہلوکین کے ورثاء کو ہر ممکن مدد کا تیقن‘14اپریل کو ملاقات کا اعلان
کولکتہ: چیف منسٹر مغربی بنگال ممتا بنرجی نے اتوار کو الیکشن کمیشن پر شدید تنقید کرتے ہوئے کہا کہ الیکشن کمیشن کا نام بدل کر ایم سی سی یعنی مودی کوڈ آف کنڈکٹ رکھنا چاہیے، بنگال اسمبلی انتخابات کے چوتھے مرحلہ میں پولنگ کے دوران تشدد اور کوچ بہار علاقہ میں 4 افراد کی موت پر جاری ہنگامہ کے درمیان الیکشن کمیشن نے کسی بھی سیاسی جماعت کے قائدین کو کوچ بہار جانے پر روک لگا دی ہے۔ اس پابندی کے بعدٰ ممتا بنرجی نے آج ویڈیو کانفرنسنگ کے ذریعہ حادثہ میں جاں بحق افراد کے لواحقین سے بات چیت کی۔ ٰ ممتا بنرجی نے متاثرین کے اہل خانہ کو ہر ممکن مدد کا تیقن دیا۔اس سے قبل سلی گوڑی میں پریس کانفرنس سے خطاب کرتے ہوئے ممتا بنرجی نے کہا تھا کہ یہ واقعہ سازش کا نتیجہ ہے۔ فائرنگ کے بعد حالات کو دیکھتے ہوئے الیکشن کمیشن نے کوچ بہار جانے پر روک لگا دی جبکہ واقعہ کے فوری بعد ممتا بنرجی نے کوچ بہار جانے کا اعلان کر دیا تھا۔لہدا انہوں نے ویڈیو کانفرنسنگ کے ذرعیہ مہلوکین کے لواحقین کے ساتھ اظہار تعزیت کیا جب ان سے پوچھا گیا کہ کیا اس واقعے سے متعلق کوئی ایف آئی آر درج کی گئی ہے؟ اس پر شک کا اظہار کرتے ہوئے ممتا نے کہا کہ پولیس اس معاملے کو الگ سمت دے سکتی ہے۔ انہوں نے بتایا کہ 14 اپریل کو وہ کوچ بہار جائیں گی اور جاں بحق افراد کے لواحقین سے ملاقات کریں گی۔خیال رہے کہ مغربی بنگال کے کوچ بہار میں پولنگ بوتھ کے باہر فائرنگ میں چارافراد کی موت ہوگئی ہے۔ مرکزی فورسیس نے دعویٰ کیا ہے کہ یہ فائرنگ مجبوری میں کی گئی تھی۔ذرائع کے مطابق جاں بحق ہونے والے افراد کی شناخت منیرالزمان، حمید میاں، چمن الحق اور نور عالم میاں کے طور پر ہوئی ہے۔