دونوںممالک میں تعلقات کے استحکام کی توقع‘ الحکیم مسجد کا دورہ بھی کریں گے
واشنگٹن: وزیر اعظم نریندر مودی آج اپنے امریکی سرکاری دورے کے اختتام کے بعد مصر روانہ ہو گئے جہاں ان کا شاندار استقبال کیا گیا۔ امریکی دورہ کے دوران وزیر اعظم مودی نے صدر جو بائیڈن کے ساتھ بات چیت کی اور امریکی پارلیمنٹ کے مشترکہ اجلاس سے خطاب کیا۔ حکومت اس دورہ کو کامیاب قرار دے رہی ہے ۔ دو ممالک کے اپنے دورہ کے دوسرے مرحلہ میں وزیر اعظم مصر کیلئے روانہ ہوگئے۔ یہ وزیر اعظم کا مصر کا پہلا دورہ ہے۔ وزیر اعظم مودی صدر عبدالفتاح السیسی کی دعوت پر مصر کا دو روزہ سرکاری دورہ کررہے ہیں۔ وزیر اعظم مودی مصر کے صدر السیسی کے ساتھ دو طرفہ بات چیت کریں گے۔ اس دوران کچھ معاہدوں پر دستخط بھی کیے جائیں گے۔وزیر اعظم نریندر مودی 24 سے 25 جون تک مصر کے سرکاری دورے پر ہوں گے۔ اس دوران دونوں ملکوں کے درمیان تعلقات کو مضبوط بنانے اور کاروباری اور اقتصادی تعاون کے نئے شعبوں میں تعاون بڑھانے پر بات کی جائے گی۔ السیسی نے ہندوستان کے یوم جمہوریہ کی تقریبات میں بطور مہمان خصوصی شرکت کی تھی، انہوں نے اسی وقت وزیر اعظم مودی کو مصر کے دورے کی دعوت دی۔اپنے دورہ مصر کے دوران وزیر اعظم مودی الحکیم مسجد کا دورہ کریں گے جس کی تزئین و آرائش بوہرہ برادری کے تعاون سے کی گئی تھی۔ وہ ہیلیو پولیس جنگی یادگار کا بھی دورہ کریں گے اور شہید ہندوستانی فوجیوں کو خراج عقیدت پیش کریں گے۔ وزیر اعظم مودی کا مصر کا دورہ صدر السیسی کے ہندوستان کے دورے کے 6 ماہ کے اندر ہو رہا ہے، جو اس کی اہمیت کو ظاہر کرتا ہے۔وزیر اعظم مودی سینئر معززین، کچھ سرکردہ مصری شخصیات اور مصر میں ہندوستانی برادری سے بات چیت کریں گے۔ وزیر اعظم مودی ‘انڈیا یونٹ’ سے بھی بات چیت کریں گے، جو مارچ میں مصری صدر کے دورہ ہندوستان سے واپس آنے کے بعد تشکیل دیا گیا تھا۔ اس یونٹ میں کئی اعلیٰ سطحی وزراء شامل ہیں۔وزیر اعظم مودی اور صدر سی سی کے درمیان بات چیت کے دوران، دو طرفہ تجارت کو موجودہ تقریباً 7 بلین ڈالر سے بڑھا کر اگلے پانچ سالوں میں 12 بلین ڈالر کرنے کا فیصلہ کیا گیا تھا۔ ہندوستان اور مصر کے درمیان دفاعی اور تزویراتی تعلقات گزشتہ برسوں کے دوران بہتر ہوئے ہیں۔ دونوں ممالک کی افواج نے رواں سال جنوری میں پہلی مشترکہ مشقیں بھی کی تھیں۔