صنعاء : یمن میں حوثی ملیشیا نے ایک بار پھر دارالحکومت صنعاء میں امریکی سفارتخانہ کے ملازمین کو نشانہ بنانا شروع کر دیا ہے۔ واضح رہیکہ یہ سفارتخانہ 7 برس سے بند ہے۔ میڈیا نے منگل کو بتایا کہ حوثی ملیشیا نے میڈیا پرسن عبدالرحمن سیف الشرعبی کو اغوا کر لیا۔ وہ امریکی سفارتخانے میں میڈیا اتاشی کے معاون ہیں۔حوثیوں نے گذشتہ برس اکتوبر کے وسط سے دارالحکومت صنعاء میں امریکی سفارتخانہ کے ملازمین کے خلاف گرفتاریوں کی مہم کا آغاز کیا تھا۔ اس کے ساتھ ایران نواز ملیشیا نے سفارتخانہ کی عمارت پر دھاوا بول کر وہاں کے پہرے داروں کو اپنے مسلح عناصر سے تبدیل بھی کر دیا۔ حوثیوں نے سفارتخانے میں موجود ساز و سامان اور آلات کی بڑی تعداد کو لوٹ لیا تھا۔تاہم بین الاقوامی کوششوں سے بعد ازاں گرفتار ملازمین کی رہائی عمل میں آئی۔امریکی ذمہ داران نے چند ماہ قبل اعلان کیا تھا کہ یمن کیلئے ان کے خصوصی نمائندے ٹم لینڈرکنگ کی کوششوں کے نتیجہ میں امریکی سفارتخانے کے 30 یمنی ملازمین کو آزاد کر دیا گیا۔ واضح رہیکہ صنعاء پر حوثیوں کے قبضہ کے بعد امریکی سفارتخانہ 2015ء سے بند ہے۔ تاہم بعض یمنی ملازمین نے گھروں سے کام کا سلسلہ جاری رکھا۔ اسی طرح عمارت کے پہرے دار بھی اپنی ذمہ داریاں انجام دیتے رہے۔
