مولانا محمود مدنی سے چیرمین کے ایم جی ملک فوڈ لمیٹیڈ بسودیو گرگ اور نائب صدر ساجد چودھری کی ملاقات
نئی دہلی: ملک میں امن و امان، آپسی بھائی چارہ اورمذہبی اتفاق و اتحادہی ہندوستان کی شناخت ہے ۔ہندوستان کی سالمیت، استحکام اور خوشحالی کیلئے ضروری ہیکہ ملک میں بھائی چارہ اور امن و امان کی فضا قائم ہو اور انصاف کا بول بالا ہو۔ان خیالات کا اظہارکے ایم جی ملک فوڈ لمیٹیڈ کے چیرمین بسودیو گرگ اور نائب صدر ساجد چودھری نے جمعیت علمائے ہند کے جنرل سکریٹری مولانا محمود مدنی سے ملاقات کے دوران کیا۔ ملک کی موجودہ صورتحال پر مولانا محمود مدنی سے ملاقات کے دوران ملک کو فرقہ پرست عناصر سے لاحق خطرات پر تفصیلی گفتگو ہوئی۔ ان تینوں اہم شخصیات نے اس بات سے اتفاق کیا کہ ملک کی ترقی اور خوشحالی کیلئے امن وامان کی فضا قائم کرنا لازمی ہے اور فرقہ پرست عناصرکی حوصلہ شکنی ضروری ہے ۔ کوئی بھی ملک اسی وقت ترقی سے ہمکنار ہوتا ہے ، جب وہاں رہنے والے ہر شخص کو انصاف ملے اوربغیر مذہبی تفریق سب کے ساتھ یکساں سلوک کیا جائے ۔دریں اثناء کے ایم جی ملک فوڈ لمیٹیڈ کے نائب صدر ساجد چودھری نے کہا کہ ہمارا ملک مختلف مذاہب کا ایک خوبصورت گلدستہ ہے ، جس بات کا اعتراف پوری دنیا کرتی ہے ۔ہمیں اس گلستان کو فرقہ پرست طاقتوں سے ہر قیمت پر بچانا ہے اور ملک میں امن و امان کی فضا قائم کرنی ہے ۔کچھ لوگ اس عظیم جمہوری ملک اور گنگا جمنی تہذیب کوپارہ پارہ کرنے کی کوشش میں لگے ہوئے ہیں، جنھیں ہمیں ہر صورت میں ناکام بنانا ہے۔ملاقات میں زور دیا گیا کہ شرپسند اور انتشار پسند عناصر کی سرکوبی کرنا وقت کی ضرورت ہے ورنہ ہندوستان کا تانا بانا بکھرجانے کا اندیشہ ہے۔ انہوں نے مزید کہا کہ تاریخ شاہد ہیکہ جب کسی ملک کے شہریوں میں بے چینی، ظلم و تشدداور ناموافق حالات پیدا ہوئے تو ترقی کی رفتار رک جاتی ہے ، خوشحالی دم توڑ دیتی ہے اورہر طرف افراتفری اور خوف کا ماحول پیداہوجاتاہے ۔ آخر میں مولانا محمود مدنی نے ملک میں بھائی چارہ اور امن و اتحاد کیلئے دعا کی اوراس سمت میں مل کر کام کرنے کی یقین دہانی کرائی۔
