’’بنگلہ دیشیوں کو اپنے ملک میں کھانا نہ ملنے پر دراندازی ‘‘کے بیان پر شدید ردعمل
ڈھاکہ : بنگلہ دیش نے در اندازی سے متعلق ہندوستانی وزیر داخلہ کے بیان پر شدید نکتہ چینی کرتے ہوئے کہا کہ ہندوستان اور بنگلہ دیش کے مابین جب اس طرح کے گہرے رشتے ہوں تو ان کا ایسا بیان، ’’ناقابل قبول ہے۔‘‘بنگلہ دیش کے وزیر خارجہ اے کے عبد المومن کا کہنا ہے کہ بنگلہ دیش سے متعلق امیت شاہ کا علم بہت محدود ہے شاید اسی لیے انہوں نے ایسی بات کہی ہوں گی۔ہندوستان کے وزیر داخلہ اور مودی کے قریبی ساتھی امیت شاہ نے دو روز قبل اپنے ایک انٹرویو میں کہا تھا کہ بنگلہ دیش میں لوگوں کے پاس کھانے کو نہیں ہے اسی لیے وہ ہندوستان میں در اندازی کی کوشش کرتے رہتے ہیں۔اس سے متعلق جب ڈھاکہ کے ایک مقامی اخبار نے بنگلہ دیشی وزیر خارجہ اے کے عبد المومن سے سول کیا تو انہوں نے کہا،’’اس دنیا میں بہت سے عقل مند لوگ ہیں، کچھ تو دیکھنے کے بعد نظر انداز کر جاتے ہیں، وہ آگاہی کے باوجود بھی اسے سمجھنا نہیں چاہتے۔ لیکن اگر انہوں (امیت شاہ) نے ایسا کہا ہے تو میں یہی کہوں گا بنگلہ دیش سے متعلق ان کا علم بہت محدود ہے۔ بنگلہ دیش میں بھوک سے کوئی نہیں مرتا ہے۔ یہاں قحط سالی جیسی کوئی غربت نہیں ہے۔‘‘ان کا مزید کہنا تھا کہ اس طرح کے تبصرے،’’قطعی ناقابل قبول ہیں‘‘۔ بنگلہ دیشی وزیرر خارجہ نے کہا کہ بہت سے سماجی سیکٹر میں بنگلہ دیش امیت شاہ کے ملک سے بھی بہتر ہے۔ انہوں نے کہا کہ بنگلہ دیش میں تقریبا نوئے فیصد لوگ اچھی قسم کے بیت الخلاء کا استعمال کرتے ہیں جبکہ بھارت کی پچاس فیصد سے بھی زیادہ آبادی آج بھی ٹوائلٹ کی سہولیات سے محروم ہے۔ان کا مزید کہنا تھا کہ بنگلہ دیش میں اعلی تعلیم یافتہ افراد کے لیے روزگار کی کمی ضرور ہے تاہم متوسط درجے کے تعلیم یافتہ افراد کے ساتھ ایسا نہیں ہے،’’ایک لاکھ سے بھی زیادہ بھارتی شہری بنگلہ دیش میں کام کرتے ہیں۔ ہمیں بھارت جانے کی کیا ضرورت نہیں ہے۔