نئی دہلی، 02 جنوری (یو این آئی) کانگریس کے سابق صدر راہول گاندھی نے مدھیہ پردیش کے شہر اندور میں شہریوں کو ’زہریلے پانی‘ کی فراہمی پر گہری تشویش کا اظہار کرتے ہوئے اسے انتظامیہ کی لاپرواہی قرار دیا ہے اور وزیراعظم نریندر مودی سے سوال کیا ہے کہ وہ آخر ایسے حساس معاملات پر بھی اپنی خاموشی کیوں نہیں توڑتے ؟ انہوں نے کہا کہ پینے کا صاف پانی عوام کا حق ہے لیکن بی جے پی کی لاپرواہ حکومت لوگوں میں ’زہریلا پانی‘ بانٹ رہی ہے ۔ متاثرہ خاندانوں کو تسلی دینے کے بجائے بی جے پی رہنما متکبرانہ بیانات دے رہے ہیں۔ حیرت کی بات یہ ہے کہ وزیراعظم اس سنگین اور انتہائی حساس مسئلے پر بھی خاموش ہیں ۔ راہول گاندھی نے جمعہ کو سوشل میڈیا پلیٹ فارم ’ایکس ‘پر لکھا کہ اندور میں پانی نہیں، زہر بنا اور انتظامیہ ’کُمبھ کرن‘ کی نیند سوتی رہی۔ گھر گھر ماتم ہے ، غریب بے بس ہیں اور اوپر سے بی جے پی لیڈروں کے متکبرانہ بیانات۔ جن کے گھروں کے چولہے بجھ گئے ہیں، انہیں تسلی کی ضرورت تھی لیکن حکومت نے متکبرانہ رویے کا مظاہرہ کیا۔