ماں کی موت سے بچے بے خبر ، دوسری بیوی بھی ہراسانی میں ملوث
حیدرآباد :۔ دوسری بیوی کے ساتھ پہلی بیوی کی لڑکیوں پر ظلم و زیادتی کرنے والے ایک ریٹائرڈ فوجی کو پولیس نے گرفتار کرلیا ۔ بتایا جاتا ہے کہ ایک رضاکار تنظیم کی مدد سے لڑکیوں نے باپ کے خلاف جاری جدوجہد میں کامیابی حاصل کی جو سوتیلی ماں کے ساتھ مل کر ان پر ظلم و زیادتی اور جنسی طور پر ہراساں کررہا تھا ۔ تاخیر سے منظر عام پر آئے اس واقعہ سے سنسنی پیدا ہوگئی ۔ ذرائع کے مطابق ریٹائرڈ آرمی ملازم پہلے ہماچل پردیش میں خدمات انجام دیتا تھا اس کی دو بیٹیاں اور ایک بیٹا نانا نانی کے پاس رہتے تھے ۔ سال 2016 میں ان بچوں کی ماں یعنی آرمی جوان کی بیوی فوت ہوگئی ۔ اس بات کی اطلاع اس نے بچوں کو نہیں دی اور خود اکیلے ہی بیوی کی آخری رسومات کو انجام دیا اور چند روز بعد دوسری شادی کرلی ۔ والدہ کی موت پر شبہ ظاہر کرتے ہوئے والد کے طرز عمل سے ان بچیوں نے آرمی کے اعلیٰ عہدیداروں کو واقف کروایا اور تحریری شکایتیں کی اور واپس ہوگئے جس کے بعد اس آرمی جوان نے اپنی لڑکیوں کو تنگ کرنا شروع کردیا اور وقفہ وقفہ سے شہر حیدرآباد پہونچکر انہیں ہراساں کرتا تھا اور ظلم کا شکار بناتا تھا ۔ آرمی عہدیداروں نے ان بچیوں کی حالت کو دیکھ کر باپ کے ساتھ کوارٹرس میں رہنے کی اجازت دی ۔ اس اقدام سے ریٹائرڈ آرمی جوان برہم ہوگیا اور بچوں پر جنسی زیادتی کرنے لگا اور پھر انہیں جبراً اپنی دوسری بیوی کی مدد سے انہیں حیدرآباد میں چھوڑ دیا ۔ جس کے بعد وی آر ایس لینے کے بعد عنبر پیٹ میں مقیم ان لڑکیوں نے پولیس سے شکایت کی تھی لیکن کوئی کارروائی نہیں ہوئی جس کے بعد ’ سکھی ‘ نامی رضاکار تنظیم کی مدد سے گذشتہ ماہ کی 24 تاریخ کو اس کے خلاف کیس درج کیا گیا اور پولیس نے بالآخر ریٹائرڈ آرمی جوان کو گرفتار کرتے ہوئے اس کو جیل منتقل کردیا ۔۔
