نئی دہلی،6نومبر(سیاست ڈاٹ کام)عام آدمی پارٹی (عاپ) کے سربراہ اور دہلی کے وزیراعلی اروند کجریوال نے صدر جمہوریہ رام ناتھ کووند کے اس فیصلے کا زوردارخیر مقدم کیا ہے جس میں انہوں نے آپ کے 11ارکان اسمبلی کو فائدے کے عہدے کے معاملے میں نااہل ٹھرائے جانے سے متعلق عرضی کو الیکشن کمیشن کے مشورے پر خارج کردیا اور ان ارکان اسمبلی کی رکنیت برقرار رکھنے کا فیصلہ کیا ہے۔ اروند کیجریوال نے چہارشنبہ کو کووند کے فیصلے پر خوشی کا اظہار کرتے ہوئے ٹویٹ کیا،‘‘آخر کار سچائی کی جیت ہوئی۔ستیہ میو جیتے ۔’’ آپ کے لیڈر اور دہلی کے وزیر راجیندر پال نے بھی اس فیصلے کا خیرمقدم کرتے ہوئے کہا،‘‘جھوٹ کی بنیاد پر یہ عرضی دائر کی گئی تھی۔اسے خارج تو ہونا ہی تھا۔’’ واضح رہے کہ کووند نے آپ کے 11ارکان اسمبلی کو فائدے کے عہدے کے معاملے میں نااہل ٹھہرائے جانے سے متعلق عرضی کو الیکشن کمیشن کے مشورے پر منگل کو خارج کردیا اور ان ارکان اسمبلی کی رکنی برقرار رکھنے کا فیصلہ کیا۔ کووند نے ایک حکم جاری کرکے سنجیو جھا،نیتن تیاگی ،پروین کمار،پون کمار شرما،شریدت شرما،راجیش گپتا،دنیش موہنیا ،امان اللہ خان ،کیلاش گہلوٹ،جرنیل سنگھ اور محترمہ سریتا سنگھ کو نااہل ٹھہرائے جانے کی عرضی خارج کردی ہے اور ان کی اسمبلی میں رکنیت کو برقرار رکھنے کا فیصلہ کیا ہے ۔ اس حکم کی کانقل کل میڈیا کو جاری کی گئی ہے ۔ صدر نے اس سلسلے میں جاری حکم میں کہا ہے کہ انہوں نے قومی دارالحکومت دہلی ایکٹ 1991 کے سب ڈیویژن 15کے سب ڈیویژن چارکے تحت دئے جانے والے حقوق کے تحت فائدے کے عہدے کے معاملے میں ان ارکان اسمبلی کو نااہل ٹھہرائے جانے سے متعلق عرضی کو خارج کیا ہے ۔
