واشنگٹن: فلسطینیوں کے خلاف اسرائیلی بمباری اور غزہ میں اب تک پندرہ ہزار سے زائد ہلاکتوں کے خلاف امریکی شہر اٹلانٹا میں غیر معمولی احتجاجی منظر سامنے آیا ہے ۔ اٹلانٹا میں اسرائیلی قونصل خانے کے باہر احتجاجاً ایک خاتون نے خود کو آگ لگا لی۔اسرائیلی بمباری کے خلاف خود سوزی کی کوشش کرنے والی خاتون کی حالت نازک بتائی گئی ہے ۔ خاتون کو بچانے کی کوشش میں ایک سکیورٹی گارڈ بھی زخمی ہوگیا ہے ۔ میڈیا رپورٹ کے مطابق پولیس چیف نے ایک نیوز کانفرنس میں بتایا کہ خاتون فلسطینی پرچم کے ساتھ احتجاج کے مقام پر پہنچی اور خود کو اس میں لپیٹ لیا اور آگ لگالی ۔ تاہم اس کی حالت نازک ہے ۔ پولیس حکام نے نیوز کانفرنس میں اس بارے میں کچھ نہیں بتایا ہے کہ اسرائیلی قونصل خانے کے باہر سکیورٹی اہلکاروں کی موجودگی میں خود سوزی کی کوشش کرنے والی خاتون کو ایسا موقع کیسے مل گیا۔پولیس کے سربراہ نے کہا البتہ قونصل خانے کی عمارت مکمل محفوط ہے اور اس کے لیے کوئی خطرے والی بات نہیں۔ پولیس سربراہ کا کہنا ہے کہ یہ انتہائی سیاسی اقدام تھا۔خود سوزی کرنے والی خاتون بارہ بج کر سترہ منٹ پر قونصل خانے کی بلڈنگ کے باہر پہنچی۔
اس بلڈنگ میں قونصل خانے کے علاوہ اور بھی کئی کاروباری دفاتر ہیں۔فیڈرل بیورو آف انوسٹی گیشن (ایف بی آئی) نے بتایا کہ وہ مقامی قانون نافذ کرنے والے اداروں کے ساتھ رابطے میں ہیں۔ تاہم واشنگٹن میں موجود اسرائیل کے سفارت خانے اور اٹلانٹا میں موجود قونصل خانے کے حکام نے اس معاملے پر کسی بھی قسم کے فوری تبصرے سے انکار کیا ہے ۔واضح رہے اسرائیل نے جنگ بندی کے مختصر وقفوں کے بعد جمعہ کے روز غزہ پر دوبارہ بمباری کی ہے اور 178 فلسطینیوں کو ہلاک کر دیا ہے ۔ اسرائیل کی بمباری کے خلاف دنیا کے کئی شہروں میں احتجاج ہو رہا ہے ۔
