لوک سبھا الیکشن 2024 کی حکمت عملی سمیت مختلف اہم امور پر تبادلہ خیال متوقع
ممبئی: اپوزیشن کے اتحاد ’انڈیا‘ کا اجلاس کل سے ممبئی میں شروع ہونے جا رہا ہے۔میڈیا رپورٹ کے مطابق انڈیا کا دو روزہ اجلاس 31 اگست اور یکم ستمبر کو منعقد ہوگا اور اس کے لئے ممبئی کے ہوٹل گرینڈ حیات میں 150 کمرے بک کئے گئے ہیں۔ اپوزیشن اتحاد ’انڈیا‘ کے اجلاس کے ایجنڈے میں اتحاد کے ’لوگو ‘کی نقاب کشائی، رابطہ کمیٹی کی تشکیل، کنوینرز کی تقرری، عام انتخابات کے لیے ممکنہ سیٹ شیئرنگ فارمولے یعنی نشستوں کی تقسیم کے فارمولے پر بحث، عام انتخابات کے لیے حکمت عملی اور کئی دیگر اہم امور شامل ہیں۔شیو سینا یو بی ٹی نے پیر کے روز اپوزیشن اتحاد انڈیا کے ممبئی اجلاس کے حوالہ سے پہلا ویڈیو ٹیزر جاری کیا تھا۔ رپورٹ کے مطابق ہوٹل میں کمروں کی بکنگ اور 31 اگست کو عشائیہ کا انتظام شیو سینا یو بی ٹی کی جانب سے کیا جا رہا ہے، اس دن اتحاد کے قائدین غیر رسمی ملاقات کریں گے۔ جبکہ اگلے دن یعنی یکم ستمبر کو کانگریس کی جانب سے ظہرانہ کا اہتمام کیا جائے گا اور اس دن تمام قائدین رسمی ملاقات کریں گے۔اتحاد کے اجلاس کے حوالہ سے تمام اخباروں اور دیگر مقامات پر اشتہارات کی ذمہ داری بھی کانگریس پارٹی کو سونپی گئی ہے۔ این سی پی کی جانب سے تمام مہمانان کے لئے گاڑیوں کا انتظام کیا جا رہا ہے۔ سنجے نروپم ایئرپورٹ پر تمام مہمانوں کا استقبال کریں گے جبکہ ملند دیوڑا مہمانوں کا ہوٹل میں خیرمقدم کریں گے۔