نئی دہلی : کورونا وائرس سے قومی راجدھانی دہلی میں بگڑتے حالات کے بعد اسکان نے ایک بار پھرکورونا متاثرین کے لئے تعاون کا ہاتھ بڑھایا ہے ۔ کوروناوائرس کی پہلی لہر کے دوران اسکا ن نے یومیہ پانچ لاکھ افراد کو امداد فراہم کی تھی ۔‘فوڈ فارلائف پہل’ کے تحت شرون کمارسیوا کی سروس شروع کی جارہی ہے ، جس میں کووڈ سے متاثرہ عمر رسیدہ افراد ، حاملہ خواتین اور دیگر کو ان کے گھروں تک کھانا پہنچایا جارہا ہے ۔ کھانا غذائیت اورقوت مدافعت میں اضافہ کرنے والے اجزا پر مشتمل ہے ۔اسکان دہلی کا ماننا ہے کہ مناسب غذائیت سے متعلق خوراک کے استعمال سے وبائی بیماری کا خطرہ کم ہوجاتا ہے ۔ اپنے گھروں پر کھانا حاصل کرنے کیلئے ضرورت مند افراد 9717544444 پر رابطہ کرسکتے ہیں۔ کورونا پروٹوکول پر عمل کرتے ہوئے کھانے کی تقسیم کے لئے الگ الگ ٹیمیں تشکیل دی گئیں ہیں ، تاکہ انفیکشن پھیلنے کا خطرہ کم سے کم ہو۔اسکان جی بی سی کے گوپال کرشنا گوسوامی مہاراج نے آج کہا‘‘اسکا ن انسانیت کی خدمت کے اپنے عہد پر قائم ہے ۔ کرونا کی دوسری لہر تیزی سے لوگوں کو اپنی گرفت میں لے رہی ہے اور اس مرحلے میں ہم لوگوں کے گھروں تک کھانا پہنچا رہے ہیں۔ ہماری کوششیں حکومت کے تعاون کے بغیر کامیاب نہیں ہوپائیں گی ‘‘ ۔