تہران: ایرانی فوج نے اپنی سالانہ دو روزہ مشقوں کے خاتمے کا اس وقت اعلان کردیا جب امریکہ نے ایرانی خطرات کو روکنے کیلئے خلیجی علاقہ میں جنگی جہاز اور اضافی دستے بھیجے تھے۔ گزشتہ ماہ ایرانی فوج کی جانب سے آبنائے ہرمز میں دو آئل ٹینکرز کو روکے جانے کی کوشش کی جواب میں امریکہ نے خلیجی علاقے میں اضافی جنگی جہاز بھیجے تھے۔میڈیا کے مطابق ملک بھر میں 11 فضائی اڈوں نے ان مشقوں میں حصہ لیا۔ ان مشقوں کو ’’ ولایت فقیہ کیلئے فدائی‘‘ کا نام دیا گیا تھا۔ یہ مشقیں اتوار کو شروع کی گئی تھیں۔یہ مشقیں اصفہان صوبہ میں نظنز نیوکلیئر تنصیب کے قریب شروع کی گئی تھیں اور ان میں خلیجی علاقہ، آبنائے ہرمز اور ملک کے شمال مشرق اور شمال مغرب میں سرحدی علاقہ شامل تھے۔ ایجنسی نے بتایا کہ اتوار سے خلیج اور ایران کے دیگر حصوں میں 90 سے زیادہ لڑاکا طیاروں اور ڈرونز نے مشقوں میں حصہ لیا۔فضائیہ کے کمانڈر لیفٹیننٹ جنرل حمید واحدی نے کہا کہ یہ مشقیں خطے میں دوستی، امن اور سلامتی کا پیغام ہیں۔ انہوں نے کہا کہ ان مشقوں کے ایجنڈے میں پائیدار سلامتی، علاقائی تعلقات میں بہتری اور مضبوطی، پرامن بقائے باہمی اور فضائی سرحدوں کا دفاع شامل ہے۔
