واشنگٹن ۔ 13 ستمبر (سیاست ڈاٹ کام) امریکی صدر ڈونالڈ ٹرمپ نے کہا ہے کہ انہیں لگتا ہے کی ایرانی قیادت ملاقات کی خواہاں ہے۔ اس بیان کے بعد یہ توقع بڑھ گئی ہے کہ وہ اقوام متحدہ اسمبلی کے پیش آئند سمٹ کے موقع پر اپنی ایرانی ہم منصب سے ملاقات کا کوئی جواز نکالنے والے ہیں۔وائٹ ہاؤس میں صحافیوں سے بات کرتے ہوئے صدر ٹرمپ کا کہنا تھا کہ ’’میں آپ کو بتاتا چلوں کی ایران، امریکی قیادت سے ملنے کا خواہش مند ہے۔‘‘ڈونلڈ ٹرمپ متعدد بار اس امر کی جانب اشارہ کر چکے ہیں کہ وہ صدر حسن روحانی سے ملنے کو تیار ہیں۔ صدر روحانی اس مہینے کے آخری عشرے کے دوران ہونے والی یو این جنرل اسمبلی کے اجلاس میں شریک ہوں گے۔چہارشنبہ کے روز ایرانی صدر نے تہران پر دباؤ ڈالنے کی امریکی پالیسی پر شدید تنقید کرتے ہوئے کہا کہ امریکیوں کو جان لینا چاہئے جنگی جنون امریکہ کے مفاد میں نہیں ہے۔ امریکہ کو اسے چھوڑنا ہو گا۔امسال مئی ہے تہران اور امریکہ کے درمیان تعلقات کشیدہ چلے آ رہے ہیں کیونکہ واشنگٹن نے 2015 میں عالمی طاقتوں کے ایران سے طے پانے والے جوہری معاہدے سے یک طرفہ طور پر نکلنے کا اعلان کیا تھا، جس کے بعد تہران پر امریکی پابندیوں کا نہ ختم ہونے والا سلسلہ شروع ہوا، جو تادم تحریر جاری ہے۔