واشنگٹن ۔ امریکی صدر جوبائیڈن نے کہا کہ ایران سے نیوکلیر پروگرام پر بات چیت جاری ہے۔ اگر تہران سے بات چیت میں ناکامی ہوئی تو دوسرا متبادل استعمال کریں گے۔ امریکی میڈیا کے مطابق صدر جو بائیڈن سے واشنگٹن میں اسرائیلی وزیر اعظم نے ملاقات کی جس میں باہمی تعلقات کے فروغ اور ایران سے متعلق امور پرتبادلہ خیال کیا گیا۔ صدر بائیڈن اور اسرائیلی وزیراعظم بینٹ نے اپنی پہلی بالمشافہ ملاقات میں دونوں ملکوں کے درمیان قریبی تعلقات جاری رکھنے کے عہد کا اعادہ کیا۔ اس موقع پر صدرجوبائیڈن نے کہا کہ ایران کسی صورت جوہری طاقت نہیں بن سکتا ایران سے نیوکلیر پروگرام پر بات چیت جاری ہے اگر تہران سے بات چیت میں ناکامی ہوئی تو دوسرا متبادل استعمال کریں گے۔ صدر نے کہا کہ یہ بات یقینی ہے کہ ایران نیوکلیئرہتھیار استعمال نہ کر سکے اس کے لیے سفارتکاری کو پہلی ترجیح دے رہے ہیں۔ امریکی میڈیا کا کہنا ہے کہ ملاقات میں فلسطین کا معاملا بھی زیرغور آیا۔ قبل ازیں وزیر خارجہ بلنکن نے اسرائیل کے وزیراعظم سے ملاقات کی، انہوں نے کہا کہ ہم نے اسرائیل کی سلامتی کے لیے امریکہ کے عہد سمیت امریکہ۔اسرائیل شراکت کی اہمیت پر تبادلہ خیال کیا، میں دونوں ممالک کی شراکت جاری رہنے اور وزیراعظم اوران کی حکومت کے ساتھ کام کرنے کا متمنی ہوں۔
