تہران ۔ 11 جون (سیاست ڈاٹ کام) عالمی نیوکلیئر توانائی ایجنسی کے سیکرٹری جنرل ‘یوکیا امانو’ نے دعویٰ کیا ہے کہ ایران نے افزودہ شدہ یورینیم کی مقدار بڑھا دی ہے۔ پیر کو ایک بیان میں یوکیا امانو نے کہا کہ ایران کی طرف سے یورینیم کی افزدوگی میں اضافہ باعث تشویش ہے۔ ان کا کہنا تھا کہ ایران اور امریکہ کے درمیان جاری تنائو کی وجہ سے پہلے ہی کشیدگی کی فضاء پائی جا رہی ہے۔ ایران پر الزام ہے کہ اس نے 2015ء کو طے پائے نیوکلیئر سمجھوتے کی شرائط پر ان کے ضوابط کے مطابق عمل درآمد نہیں کیا۔انہوں نے اْمید ظاہر کی کہ امریکہ اور ایران کے درمیان پائی جانے والی کشیدگی میں جلد کمی آئے گی اور فریقین بات چیت کے ذریعے تنازعات کے حل پر غور کریں گے۔عالمی نیوکلیئر توانائی ایجنسی کے سربراہ نے ان خیالات کا اظہار ایجنسی کے اجلاس سے خطاب میں کیا۔