سرینگر۔ 30 جولائی ۔( سیاست ڈاٹ کام ) شمالی کشمیر کے ضلع کپواڑہ کے کرناہ علاقے کے لوگوں میں منگل کے روز اس وقت سراسیمگی اور خوف دہشت پھیل گیا جب لائن آف کنٹرول پر ہندوستان اور پاکستان کی فوج کے درمیان بھاری فائرنگ کا تبادلہ ہوا۔ذرائع کے مطابق منگل کے روز قریب ڈھائی بجے دن کرناہ کے بٹ پورہ علاقے میں لائن آف کنٹرول پر ہندوستان اور پاکستان کی فوج کے درمیان شدید فائرنگ اور گولہ باری کا تبادلہ شروع ہوتے ہی لوگ اپنے گھروں اورمحفوظ مقامات کی طرف بھاگنے لگے ۔دریں اثنا ایک پولیس افسر نے طرفین کے درمیان گولہ باری کے تبادلے کی تصدیق کرتے ہوئے کہا کہ لوگوں کو محفوظ مقامات کی طرف جانے کی صلاح دی گئی ہے ۔علاقے میں گولہ باری کا تبادلہ شروع ہوتے ہی تعلیمی ادارے اور دکان بند ہوئے اور لوگ گھروں کی طرف بھاگنے لگے ۔عینی شاہدین نے بتایا کہ گولہ باری کی آوازیں کپوڑہ کے ضلع ہیڈ کوارٹر میں سنی جاتی تھیں۔
