نئی دہلی: کانگریس لیڈر راہول گاندھی نے ہٹ اینڈ رن قانون اور ٹرک ڈرائیوروں کے احتجاج پر مرکزی حکومت پر حملہ کیا۔ انہوں نے کہا کہ بغیر بحث کے قانون بنانے کی ضد جمہوریت کی روح پر مسلسل حملے کے مترادف ہے۔کانگریس کے سابق صدر راہول نے سوشل میڈیا پر لکھا کہ جب 150 سے زیادہ ارکان پارلیمنٹ کو معطل تھے تو پارلیمنٹ میں ہندوستانی معیشت کی ریڑھ ڈرائیوروں کیخلاف قانون بنایاگیا، جس کے نتائج مہلک ثابت ہو سکتے ہیں۔محدود کمائی والے اس محنتی طبقے کو سخت قانونی بھٹی میں جھونک دینا ان کی زندگیوں کو بری طرح متاثر کر سکتا ہے۔ نیز اس قانون کا غلط استعمال منظم بدعنوانی کے ساتھ بھتہ خوری کے طریقہ کار کو بھی فروغ دے سکتا ہے۔ جمہوریت کو چابک سے چلانے والی حکومت شہنشاہ کے فرمان اور انصاف میں فرق بھول چکی ہے۔ کانگریس اور دیگر اپوزیشن جماعتیں مرکزی وزیر داخلہ امیت شاہ سے پارلیمنٹ کی سیکورٹی میں لاپرواہی کے بارے میں بیان کا مطالبہ کر رہی تھیں۔ اس دوران سرمائی اجلاس میں ہنگامہ آرائی ہوئی اور اپوزیشن ارکان پارلیمنٹ کو توہین پارلیمنٹ کے نام پر معطل کر دیا گیا۔ مختلف ریاستوں میں ٹرک ڈرائیورز سڑک حادثات کے ’ہٹ اینڈ رن‘ کے کے تعلق سے نئے تعزیراتی قانون کی شقوں کے خلاف احتجاج کر رہے ہیں۔ تعزیرات ہند کے مقام پر لائے گئے انڈین جوڈیشل کوڈ کے تحت ان ڈرائیوروں کیلئے 10 سال تک کی سزا کا التزام ہے جو لاپرواہی سے گاڑی چلا کر سنگین سڑک حادثے کا باعث بنتے ہیں اور پولیس یا انتظامیہ کو بتائے بغیر فرار ہو جاتے ہیں۔