نئی دہلی: وزیر اعظم نریندر مودی نے لوک سبھا انتخابات میں بی جے پی کی قیادت والی این ڈی اے کی مسلسل تیسری جیت کو ایک تاریخی لمحہ قرار دیتے ہوئے اس کے لیے ملک کے عوام سے اظہار تشکر کیا ہے ۔ مودی نے کہا کہ اتحاد ملک کے لوگوں کی امنگوں کو پورا کرنے کے لیے نئی طاقت کے ساتھ کام کرے گا۔18ویں لوک سبھا کے نتائج اور رجحانات کے درمیان منگل کی شام کو ایک پوسٹ میں وزیر اعظم نے کہا، “ملک کے لوگوں نے مسلسل تیسری بار این ڈی اے پر اپنے اعتماد کا اظہار کیا ہے ۔ یہ ہندوستان کی تاریخ کا ایک مثالی لمحہ ہے ۔ میں ہم وطنوں کو یقین دلاتا ہوں کہ ہم ان کی امنگوں کو پورا کرنے کے لیے نئی توانائی، نئے جوش اور نئے عزم کے ساتھ آگے بڑھیں گے ۔ میں تمام کارکنوں کو مبارکباد پیش کرتا ہوں جنہوں نے لگن اور انتھک محنت کی ہے۔ لوک سبھا انتخابات 2024 کی گنتی کے رجحانات کے مطابق بی جے پی کی قیادت والے اتحاد کو 292 سیٹیں ملنے کا امکان ہے ، جب کہ اپوزیشن ‘انڈیا گروپ’ کے امیدوار 233سیٹوں پر آگے ہیں یا جیت رہے ہیں۔ ان انتخابات میں بی جے پی اپنے بل بوتے پر اکثریت حاصل کرنے میں کامیاب نہ ہوسکی ہے لیکن اسے 543 پارلیمانی سیٹوں میں سے 240 سیٹیں ملتی نظر آرہی ہیں۔
