حیدرآباد۔ آندھراپردیش کے گورنر وشوابھوشن ہری چندن نے دو نئے وزرا اے راجو اور،سی وینوگوپال کرشناکو عہدہ اور رازداری کا حلف دلایا۔یہ حلف برداری تقریب وجئے واڑہ کے راج بھون میں منعقد کی گئی۔ اس موقع پر وزیراعلی وائی ایس جگن موہن ریڈی،اسپیکر ٹی سیتارام،وزیر دھرمناکرشناداس اور دوسروں نے شرکت کی۔کوویڈ19کے پیش نظر حلف برداری کی تقریب میں صرف محدود افراد نے ہی شرکت کی۔ان دو نئے وزرا کو پی سبھاش چندربوس اور موپی دیوی وینکٹ رمنا کی جگہ لیاگیا ہے جو راجیہ سبھا کیلئے منتخب ہوئے ۔ راجو سریکاکلم ضلع سے تعلق رکھتے ہیں جو پہلی مرتبہ 2019میں پالسا حلقہ سے اسمبلی کے لئے منتخب ہوئے ۔مچھیروں کے گروپ سے تعلق رکھنے والے موپی دیوی کی جگہ اسی طبقہ سے تعلق رکھنے والے راجو کو وزیربنایاگیا ہے ۔بالیجا طبقہ سے تعلق رکھنے والے پی سبھاش چندربوس کی جگہ اسی طبقہ سے تعلق رکھنے والے مشرقی گوداوری ضلع کے وینوگوپال کو وزارت دی گئی ہے ۔
