کولکاتا: ریاست میں فلم دی کیرالا سٹوری کی نمائش پر پابندی لگانے کے لئے ممتا بنرجی پر سخت تنقید کرنے کے بعد، مغربی بنگال بی جے پی کی طرف سے کولکتہ ہائی کورٹ میں اس حکم امتناعی کو چیلنج کرنے کا امکان ہے۔ پارٹی کی ریاستی کمیٹی کے ایک رکن نے کہا کہ اصل تنازعہ بنگال میں اس پر پابندی لگانے کے جواز کے بارے میں ہے، جب کہ کیرالا میں بھی اس کی نمائش ہو رہی ہے۔ انہوں نے کہا، ہم قانونی ماہرین سے مشورہ کریں گے اور جیسا کہ ان کی تجویز ہے، ہم مخصوص بنیادوں پر پابندی کے فیصلے کے خلاف عدالت سے رجوع کر سکتے ہیں۔ دریں اثنا، مغربی بنگال میں بی جے پی کے ریاستی ترجمان نے کہا کہ مغربی بنگال میں فلم پر پابندی مذہبی جنونیوں کے سامنے ریاستی انتظامیہ کے ہتھیار ڈالنے کی بہترین مثال ہے۔ انہوں نے کہا ایک طرح سے چیف منسٹر نے اقلیتی برادری کے عام لوگوں کی بھی توہین کی ہے جو اس طرح کی جنونیت کے برابر کے خلاف ہیں۔ یہ فیصلہ مغربی بنگال میں ایک سیاہ دور کا آغاز ہے۔ ریاستی اسمبلی میں اپوزیشن قائد سویندو ادھیکاری نے دعویٰ کیا ہے کہ دی کیرالا اسٹوری پر پابندی لگا کر، جو آئی ایس اور اس کے طریقہ کار کے خلاف ہے، چیف منسٹر نے بالواسطہ طور پر اس گروپ کے ساتھ ہمدردی ظاہرکی ہے۔اگر یہ فلم دکھائی جاتی ہے تو مغربی بنگال میں امن و امان کیوں خراب ہو جائے گا؟ فلم پر پابندی کا فیصلہ فوری طور پر واپس لیا جانا چاہیے۔ ورنہ چیف منسٹر کو استعفیٰ دے دینا چاہیے اگر وہ امن و امان برقرار نہیں رکھ پاتی ہیں۔ پیرکے روز، پابندی کا اعلان کرتے ہوئے ممتا نے کہا کہ فلم کے کچھ مناظر ریاست میں امن اور ہم آہنگی کو متاثر کر سکتے ہیں لہذا ہم نے ریاست میں ہر جگہ اس کی نمائش پر پابندی لگانے کا فیصلہ کیا ہے۔ یہ فیصلہ امن اور ہم آہنگی کو برقرار رکھنے کے لیے لیا گیا ہے۔ پابندی کا اعلان کرتے ہوئے، انہوں نے کیرالا میں بائیں بازوکی حکومت کو بھی ایسا ہی قدم نہ اٹھانے پر آڑے ہاتھوں لیا۔ بنرجی نے کہا کہ میں سی پی آئی (ایم) کی حمایت نہیں کرتا۔ میں لوگوں کے بارے میں بات کرنا چاہتا ہوں۔
