نئی دہلی : بنگلہ دیش کی وزیر اعظم شیخ حسینہ ہندوستان کے چار روزہ سرکاری دورے پر آج یہاں پہنچ گئیں۔ شیخ حسینہ کا قومی دارالحکومت پہنچنے پر ریلوے اور ٹیکسٹائل کی وزیر مملکت درشنا جردیش نے پرتپاک استقبال کیا۔ وزیر خارجہ ایس جے شنکر آج شام شیخ حسینہ سے ملاقات کریں گے ۔وزارت خارجہ کے ترجمان ارندم بگچی نے ٹویٹر پر لکھاکہ شیخ حسینہ کا دورہ دونوں ممالک کے درمیان کثیر جہتی تعلقات کو مزید مضبوط کرے گا۔ شیخ حسینہ اپنے دورے کے دوران پہلی بار صدر دروپدی مرمو اور نائب صدر جگدیپ دھنکھر سے ملاقات کریں گی اور حیدرآباد ہاؤس میں وزیر اعظم نریندر مودی کے ساتھ دو طرفہ سربراہی اجلاس میں شرکت کریں گی۔ راشٹرپتی بھون کے صحن میں ان کا رسمی استقبال کیا جائے گا اور اس کے بعد وہ بابائے قوم مہاتما گاندھی کی سمادھی پر خراج عقیدت پیش کرنے راج گھاٹ جائیں گی۔ دورہ کرنے والے وزیراعظم اور ان کے وفد کے ارکان جمعرات کو اجمیر میں خواجہ معین الدین چشتی کے مزار پر بھی جائیں گے ۔شیخ حسینہ نے اس سے قبل اکتوبر 2019 میں نئی دہلی کا دورہ کیا تھا۔ توقع ہے کہ بنگلہ دیش کے وزیراعظم اپنے دورے کے دوران اجمیر جائیں گے ۔ وزارت خارجہ نے کہا کہ حالیہ برسوں میں ہندوستان اور بنگلہ دیش نے ہمارے دونوں ممالک کے درمیان تعلقات کو برقرار رکھا ہے ۔ شیخ حسینہ کا آئندہ دورہ دونوں ملکوں کے درمیان تاریخی اور ثقافتی رشتوں، باہمی اعتماد اور افہام و تفہیم پر مبنی کثیر جہتی تعلقات کو مزید مضبوط کرے گا۔امید ہے کہ شیخ حسینہ کے دورہ کے دوران ہندوستان اور بنگلہ دیش کے درمیان جامع اقتصادی شراکت داری کے معاہدے پر دستخط کیے جائیں گے ۔شیخ حسینہ نے دورے سے قبل ڈھاکہ میں اپنی کابینہ کی میٹنگ میں معاہدے کے مسودے کو منظوری دے دی ہے ۔ دورہ کرنے والی وزیر اعظم ہندوستان کے ممتاز کاروباری لوگوں سے بھی ملاقات کریں گی۔
