معیشت میں بہتری کے دعوے مگر حقیقی صورتحال برعکس
نئی دہلی: صدرکانگریس سونیا گاندھی نے کہا ہے کہ حکومت کے ترجمان مسلسل معیشت کو بہتر بنانے کی بات کر رہے ہیں، لیکن اس کا اثر زمین پر کہیں نظر نہیں آ رہا ، اور اس کا فائدہ صرف چند منتخب سرمایہ داروں کو ہی مل رہا ہے ۔چہارشنبہ کو یہاں پارلیمنٹ کے سنٹرل ہال میں کانگریس پارلیمانی پارٹی کی میٹنگ سے خطاب کرتے ہوئے سونیا گاندھی نے کہا کہ کچھ حصص کی قیمتوں میں اضافہ اور چند کمپنیوں کو فائدہ پہنچانا نہ تو معیشت میں بہتری ہے اور نہ ہی یہ کوئی اقتصادی ترقی ۔ انہوں نے کہا کہ عام آدمی کو ترقی کے ثمرات نہیں مل رہے ، بے روزگاری عروج پر ہے اور لوگوں کے کاروبار ٹھپ ہیں۔انہوں نے کہا کہ حکومت معیشت کو بہتر نہیں کر رہی ہے بلکہ بینکوں، انشورنس کمپنیوں، پبلک سیکٹر کی کمپنیوں، ریلوے ، ہوائی اڈوں وغیرہ کو بیچ کر پیسہ اکٹھا کر رہی ہے ۔ گزشتہ سات دہائیوں کے دوران بہت محنت سے پبلک سیکٹر کی کمپنیاں بنائی گئی ہیں لیکن مودی حکومت انہیں تباہ کرنے میں لگی ہوئی ہے اور سرکاری کمپنیاں عجلت میں بیچی جارہی ہیں۔کانگریس صدر نے کہا کہ نومبر 2016 میں جب وزیر اعظم نریندر مودی نے نوٹ بندی کو لاگو کیا تھا، تب سے ملک کی معیشت گرنے لگی تھی اور انہیں ابھی تک اس کی سمجھ نہیں آئی ہے ۔ معیشت میں تیزی سے بحالی کے حکومتی دعوے بے معنی ہیں۔ انہوں نے سوال کیا کہ یہ جاننا ضروری ہے کہ یہ اصلاحات کس کے لیے کی جارہی ہیں۔انہوں نے مہنگائی کو عام لوگوں کی کمر توڑنے والی قرار دیتے ہوئے کہا کہ حکومت اسے روکنے میں ناکام ہو رہی ہے۔ انہوں نے تیل کی حالیہ کمی کو ناکافی قرار دیتے ہوئے کہا کہ قیمتیں عام آدمی کی رسائی میں ہونی چاہئیں۔
سونیا گاندھی کی سالگرہ ، کانگریس کارکنان کی اجمیر درگارہ پرحاضری
اجمیر: کانگریس کی قومی صدر سونیا گاندھی کی نودسمبر کو سالگرہ کے موقع پر آج اجمیر درگاہ میں کانگریس کارکنان نے مخملی چادر اور عقیدت کے پھول پیش کرکے ان کی لمبی عمر کی دعا کی۔کانگریس کارکنان کا ایک گروپ غریب نواز کے دربار میں پہنچا اور سالگرہ سے ایک دن پہلے صوفی سنت کے دربار میں دعا کی۔ کانگریسی اتول اگروال نے کہا کہ سونیا گاندھی کی سالگرہ جمعرات 9 ڈسمبر کو سبھی لوگ منائیں گے لیکن ہم نے آج ہی چادر پیش کرکے ان کے تئیں احرام کا اظہار کیا ہے ۔انہوں نے بتایا کہ انہوں نے جے پور میں ہونے والی کانگریس ریلی کو کامیاب بنانے کے ساتھ اترپردیش میں کانگریس کی حکومت بنے اس کے لئے بھی دعا کی ہے ۔خادم سید کلام الدین نے چادر چڑھائی اور کانگریسیوں کی دستاربندی کی۔